İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 497 Hüküm no: 563 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın varisleri ile Menemen Beytülmal Emini Mahmud arasındaki miras anlaşmazlığının sulh yoluyla halledildiği Verâsetden sulh. Vilâyet-i Anadolu’da Menemen kasabasından olup Seyyid Ali mahallesinde sâkin iken bundan akdem Sakız cezîresinde vefât eden Mehmed Ağa’nın verâseti zî-rahm cihetinden li-ebin kız karındaşı oğulları olup Foça kasabası sâkinlerinden Ali ve Yusuf ve Hızır ve Hamza ve İbrahim evlâd-ı Ramazan nâm kimesneler meclis-i şer‘-i hatîrde kasaba-i mezbûre Menemen’de Emîn-i Beytü’l-mâl ve voyvoda olmağla müteveffâ-yı mezbûrun zâhirde vâris-i ma‘rûfu olmamak zu‘muyla terekesine vâzı‘u’l-yed idiği şer‘an zâhir ve sâbit olan kıdvetü’l-emâsil ve’l-a‘yân râfi‘-i hâze’l-kitâb Mahmud Ağa tarafından ikrâr-ı âti’l-beyânı tasdîke vekîl olup mahmiye-i İstanbul’da Sultan Bâyezid mahallesinde sâkin Mehmed Çelebi b. Rasûl ve Abdülbaki Efendi b. Mehmed nâm kimesneler şehâdetleri ile şer‘an vekâleti sâbite olan Mustafa Çelebi b. el-Hâc Hızır mahzarında her biri ikrâr ve takrîr-i kelâm edip kasaba-i mezbûre Menemen sâkinlerinden olup mahalle-i mezbûrede sâkin iken bundan akdem cezîre-i merkūmede vefât eden Mehmed Ağa’nın biz li ebin kız karındaşı Âişe Hatun’un oğulları ve zî-rahm cihetinden hasran vârisleri iken mezbûr Mahmud Ağa müteveffâ-yı mezbûrun vâris-i ma‘rûfu olmamak zu‘muyla cümle terekesini ahz u kabz etmekle tereke-i müteveffâ-yı mezbûru merkūm Mahmud Ağa’dan bundan akdem da‘vâ ve taleb ve ol dahi inkâr ve muvâcehesinde şuhûd ve udûl ile verâsetimizi isbât sadedinde olmağla beynimizde münâza‘ât-ı kesîre câriye olmuş idi, el-hâletü hâzihî beynimize Müslimîn ve muslihîn tavassut edip müvekkil-i mezbûr bizimle kasaba-i mezbûre Menemen’de vâki‘ ma‘lûmü’l-hudûd iki bâb dükkân ve on altı bin nakd-i râyicün fi’l-vakt akçe üzerine inşâ-i akd-i sulh eyledikde biz dahi sulh-ı mezbûru kabûl ve bedel-i sulh olan meblağ-ı mezbûr on altı bin akçeyi müvekkil-i mezbûr yedinden tamamen ahz u kabz ve kasaba-i mezbûre Menemen’de olan dükkânları dahi kabz ve tasarrufa bizi taslît etmeğin min-ba‘d mûrisimiz müteveffâ-yı mezbûrun terekesine müte‘allika müvekkil-i mezbûr Mahmud Ağa ile da‘vâmız kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâbi‘ aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Muslu Çavuş b. Kemâleddin el-mübâşir, Ali Çelebi b. Ebûbekir, Mustafa Çelebi el-muhzır, Osman Çelebi ser-bölük-i muhzırân, Hasan Çelebi b. Mehmed.