İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 498 Hüküm no: 564 Orijinal metin no: [69a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maktul Mimarbaşı Mustafa Ağa’nın Karamürsel’deki değirmenleri ile bağının açık arttırma sonucu Hasan Efendi b. Sinan’a satıldığı Mübâya‘a-i değirmen ve bağ. Atebe-i aliyye-i Sultaniyyede Şıkk-ı Evvel Defterdârı olan sahibü’s-sa‘âdeti ve’l-iclâl, sahibü ezyâli’l-mecdi ve’l-ikbâl hazret-i Ahmed Efendi edâmallâhü eyyâme mecdihî ve ikbâlihî taraf-ı bâhirüş-şereflerinden husûs-ı câ’i’z-zikri ikrâra vekîl olup Süleyman Bey b. Sinan ve Mehmed Bey b. İbrahim şehâdetleri ile şer‘an vekâleti sâbite olan fahrü’l-e‘âlî ve’l-emâsil el-Hâc Osman Ağa b. İsmail meclis-i şer‘-i hatîrde işbu kitâbın sahibi kıdvetü ashâbi’ş-şerefi’ş-şâmih Hasan Efendi b. Sinan mahzarında bi’l-vekâle ikrâr ve takrîr-i kelâm edip bundan akdem mağdûben katl olunan Mi‘mârbaşı Mustafa Ağa’nın cümle terekesi sâdır olan fermân-ı âlî mûcebince cânib-i mîrî için kabz olunmağın maktûl-i mezbûrun terekesinden olup mahrûse-i Üsküdar kazâsı muzâfâtından Karamürsel nâhiyesine tâbi‘ Saraycık nâm karyede vâki‘ iki tarafdan tarîk-i âm ve iki tarafdan ormanlık ile mahdûd Yalakâbad nehri ile dâyir üç göz mülk değirmen ve ona muttasıl iki yüz ırgādlık bir kıt‘a ma‘lûmü’l-hudûd bağın taraf-ı mîrîden bey‘i lâzım gelmeğin bundan esbak beyne’t-tâlibîn ve’r-râgıbîn nidâ ve müzâyede olunup ragabât-ı nâs bi’l-külliye munkatı‘a oldukdan sonra semen-i misli olan yüz yirmi bin akçede mûmâ-ileyh Hasan Efendi üzerinde karâr edip ziyâde ile âhar tâlib olmamağın zikrolunan üç göz değirmen ve bir kıt‘a bağı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık müvekkil-i müşârün-ileyh hazretleri yüz yirmi bin akçeye mezbûr Hasan Efendi’ye taraf-ı mîrîden bey‘-ı bâtla bey‘ edip ol dahi ber-minvâl-i muharrer iştirâ eyledikden sonra semeni olan yüz yirmi bin akçeyi mezbûr Hasan Efendi’nin yedinden bi’t-tamam ve’l-kemâl müvekkil-i müşârün-ileyh hazretleri cânib-i mîrî için alıp kabz eyledikden sonra teslîm-i Hazîne-i âmire eylediğini müş‘ir mezbûr Hasan Efendi yedine mühürlü ve nişânlı rûznâmçe-i hümâyûn sûreti verilmeğin min-ba‘d zikrleri sebk eden üç göz değirmen ve ona muttasıl bir kıt‘a bağ mezbûr Hasan Efendi’nin mülk-i müşterâsıdır mahallerinde kabz ve tasarrufa mezbûr Hasan Efendi’yi müvekkil-i müşârün-ileyh hazretleri taslît eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâdî ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Başbâkīkulu Mehmed Ağa, Mustafa Efendi Halîfe-i Mevkūfât, İsmail Ağa birâder-i İbrahim Paşa, Süleyman Efendi Halîfe-i Rûznâmçe, Mustafa Efendi Sâhî(?)zâde(?).