İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 499 Hüküm no: 566 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşme Ana bt. Veli’nin, kızkardeşi Sâliha’dan kendisine miras kalan ½ ev hissesini kardeşi Ahmed’e sattığı Mübâya‘a-i nısf hisse. Mahmiye-i İstanbul’da ( ) Mahalle’de sâkine olup mukaddemâ fevt olan Sâliha bt. Veli nâm hatunun verâseti zevc-i metrûkü Mehmed ile li-ebeveyn kız karındaşı Eşme Ana’ya münhasıra olduğu şer‘an sâbit oldukdan sonra mezbûre Eşme Ana tarafından zikri câ’î menzilden hissesini vâzı‘u’l-yed olduğu şer‘an sâbit olan zevci mezbûr Mehmed’den taleb ve ahz ve bey‘ ve kabz-ı semen ve kendiye îsâl ve teslîme ve kabz [ve] teslîm mütevakkıf olduğu umûra vekîl olup mezbûreyi ma‘rifet-i şer‘iye ile ârifân Yusuf Bey b. Mehmed el-cündî ve Ahmed Çelebi b. Mehmed şehâdetleri ile vekâleti sâbite olan Ahmed b. Reyhan nâm kimesne meclis-i şer‘de hâfızü’l-vesîka el-Hâc Ahmed mahzarında bi’l-vekâle ikrâr ve takrîr-i kelâm edip müteveffât-ı mezbûrenin muhallefâtından olup nısf-ı şâyi‘i ırsen müvekkileme intikāl edip mahalle-i merkūmede vâki‘ bir tarafı el-Hâc Ahmed menziline ve bir tarafı Kafesdâr el-Hâc Mehmed menziline ve bir tarafı Na‘lbend Hatun menziline ve bir tarafı tarîk-i âmma müntehî iki bâb fevkānî odayı ve kenîfi müştemil mülk menzilden nısf hisse-i şâyi‘asını beyne’t-tâlibîn müzâyede ve [ba‘de] inkıtâ‘ı’r-rağbe beş bin beş yüz akçede müvekkilem mezbûre Eşme Ana’nın teyzesi oğlu mezbûr el-Hâc Ahmed üzerinde karâr edip bir akçe ziyâde ile tâlib-i âhar bulunmamağla meblağ-ı mezbûra bi’l-vekâle bey‘ ol dahi iştirâ ve kabûl eyledikden sonra semeni olan meblağ-ı mezbûr beş bin beş yüz akçeyi yedinden kabz eyledim, min-ba‘d menzil-i [mezbûr] mezbûrun mülk-i müşterâsı olup mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-hâmis aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Pîrî Bey b. Veli, Hüseyin Bey el-cündî, Mehmed Beşe b. Mustafa, İmâm Mehmed Efendi, Ramazan b., el-Hâc Hüseyin b. Receb, Mehmed b. Ma‘den, Na‘lbend(?) Mehmed b. Abdullah, Hüseyin Efendi el-Burûsî, Abdi Çelebi b. Hüseyin, Baba Rasûl b. Rıdvan.