İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 500 Hüküm no: 567 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Ferruh Bey’in varisleri arasındaki anlaşmazlığın sulh yoluyla halledildiği Sulh ibrâ. Medîne-i Hazret-i Ebî Eyyûb-ı Ensârî’de Nazperver mahallesinde sâkine iken bundan akdem fevt olan Sâliha bt. Ferruh Bey nâm hatunun verâseti zevc-i metrûkü Mehmed b. Abdülkerim nâm kimesneye ve sulbî sagīr oğlu Süleyman’a ve vâlidesi Belkıs Hatun bt. Abdülmennan’a münhasıra olup kable’l-kısme mezbûr Süleyman dahi fevt olup verâseti babası mezbûr Mehmed’e ve ceddesi merkūme Belkıs’a münhasıra ve bi-tarîkı’l-münâsaha tashîh-i meseleleri yetmiş iki sehimden olup sihâm-ı mezbûreden elli üç sehmi mezbûr Mehmed’e ve on dokuz sehmi merkūme Belkıs’a isâbet eylediği bâhir oldukdan sonra mezbûre Belkıs meclis-i şer‘de mezbûrânın terekelerine vâzı‘u’l-yed olan merkūm Mehmed mahzarında ikrâr ve i‘tirâf edip müteveffiyân-ı mezbûrânın nukūd ve akār ve menkūl ve urûz kısmından kalîl ve kesîr ve celîl ve hakīr ve bi’l-cümle ism-i mâl ıtlâk olunur terekelerinden ve mezbûre Sâliha’nın sekiz bin akçe mehr-i mü’eccelinden on dokuz sehm mukābelesinde şerâ’it-i sıhhat-i sulhu hâvî ve mevâni‘-i müfsideden ârî tehârüc-i şer‘î vechi üzere mezbûr Mehmed ile yedi bin iki yüz akçe üzerine sulh olup bedel-i sulh-ı mezbûru merkūm Mehmed yedinden bi’t-tamam ahz u kabz edip müteveffiyân-ı mezbûrânın terekelerine müte‘allika da‘vâdan mezbûr Mehmed’i ibrâ-i âmm-ı kātı‘u’n-nizâ‘la ibrâ ve ıskāt eyledim, ba‘de’l-yevm husûs-ı mezbûra müte‘allika merkūm Mehmed ile vechen mine’l-vücûh ve sebeben mine’l-esbâb da‘vâ ve nizâ‘ım ve alâka ve medhalim yokdur da‘vâ dahi edersem lede’l-hükkâm mesmû‘a olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis aşer min-Şevval li-sene isneyn ve seb‘în ve elf. Şuhûdü’l-hâl: Ahmed Ağa b. Ferruh, Mehmed b. Abdülaziz, Rasûl b. Rıdvan, Abdi b. Hüseyin, Mehmed b. Ramazan.