İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 501 Hüküm no: 569 Orijinal metin no: [69b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Çelebi b. Mustafa’nın, boşandığı eşi Fâtıma bt. Ebubekir’i ibra ettiği İbrâ. Mahmiye-i İstanbul’da Ali Paşa-yı Atîk Sûku kurbünde sâkin Abdi Çelebi b. Mustafa nâm kimesne meclis-i şer‘de hâfızü’l-vesîka Fâtıma bt. Ebûbekir mahzarında tav‘an ikrâr ve takrîr-i kelâm edip mezbûre Fâtıma Hatun bundan akdem zevcem olup mezbûre ile hüsn-i zindegânemiz olmamağla tatlîk etmiş idim, el-hâletü hâzihî mezbûre zevcem iken beynimizde zevciyete ve gayra müte‘allik nice ahz ve i‘tâ vâki‘ olmağla zevciyete ve gayra müte‘allika âmme-i de‘âvîden mezbûreyi ibrâ-i âmm ile ibrâ ve ıskāt eyledim, min-ba‘d benden veyâ vekîlimden zevciyete ve gayra müte‘allika da‘vâ sudûr ederse lede’l-hükkâm mesmû‘a olmasın dedikde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’s-sâbi‘ aşer min-Şevval li-sene 1072. Şuhûdü’l-hâl: es-Sâbıkūn.