İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 502 Hüküm no: 570 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mustafa’dan küçük kızlarına miras kalan vakıf evin açık arttırma ile Mehmed Beşe b. Ebubekir’e ferağ olunduğu Bedel-i ma‘lûma ferâğ-ı menzil. Mahmiye-i İstanbul’da Karabaş mahallesinde sâkine iken bundan akdem vefât eden Hadîce bt. Mustafa nâm hatunun sadriye sagīre kızları Âişe ve Fâtıma’nın tesviye-i umûrlarına kıbel-i şer‘den mansûb vasîleri olan fahrü’l-akrân Mehmed Ağa b. Mustafa mahfil-i kazâda işbu bâ‘isü’l-kitâb Mehmed Beşe b. Ebûbekir nâm kimesne mahzarında bi’l-vesâye ikrâr ve takrîr-i kelâm edip vasîsi olduğum sagīrân-ı mezbûrânın analarından müntakil mahalle-i mezbûrede vâki‘ Kadri Efendi Evkāfı’ndan olup bir tarafı es-Seyyid Yakub Çelebi bahçesi ve iki tarafı vakf-ı mezbûr ve bir tarafı tarîk-i hâssa müntehî bir bâb tahtânî oda ve dolabı müştemil olup icâre-i mu‘accele ve beher şehr vakf-ı mezbûra otuz akçe ücret-i mü’eccele ile sagīretân-ı mezbûretânın tasarruflarında olan menzilden gayrı ism-i mâl ıtlâk olunur bir şeyleri olmadığından mâ‘adâ zarûret-i nafaka ve eşedd-i ihtiyâcları olmağla menzil-i mahdûd-ı mezbûr sûk-ı sultanîde beyne’t-tâlibîn kirâren ve mirâren müzâyede olunup ragabât-ı nâs munkatı‘a oldukdan sonra mezbûr Mehmed Beşe üzerinde üç bin sekiz yüz akçeye karâr edip ziyâde ile tâlib-i âhar bulunmamağın vesâyetim hasebiyle merkūm Mehmed Beşe’ye üç bin sekiz yüz akçe bedel mukābelesinde ma‘rifet-i mütevellî-i vakf-ı mezbûr ile ferâğ ve tefvîz ol dahi tefevvüz ve kabûl eyledikden sonra bedel-i mezkûr üç bin sekiz yüz akçeyi merkūm Mehmed Beşe yedinden tamamen vesâyetim hasebiyle ahz u kabz eyledim, ba‘de’l-yevm menzil-i mahdûd-ı mezbûr merkūm Mehmed Beşe’nin hakk-ı müfevvazıdır, keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Ahmed Çelebi b. Ahmed, Rasûl b. Rıdvan, Hasan b. Mustafa, Şükrullah b. Mustafa, Gazanfer b. Tevekkül.