İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 513 Hüküm no: 590 Orijinal metin no: [71b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Hüseyin’in, yanık evinin arsasını içindeki enkazıyla birlikte Abdullah Ağa b. Mehmed’e sattığı Mübâya‘a-i mülk. Mahmiye-i İstanbul’da Koğacılar mahallesinden Fâtıma Hatun bt. Hüseyin tarafından husûs-ı âtîye vekîl olup mezbûrenin zâtını ma‘rifet-i şer‘iye ile ârifân Siyavuş b. Abdullah ve Ahmed b. Abdullah şehâdetleri ile şer‘an vekâleti sâbite olan Kâtib Mustafa Çelebi b. Mehmed meclis-i şer‘de işbu sahibü’l-kitâb umdetü’l-a‘yân Abdullah Ağa b. Mehmed tarafından ikrâr-ı âti’z-zikri tasdîke vekîl-i şer‘îsi olan el-Hâc Halil b. Ali mahzarında bi’l-vekâle ikrâr ve i‘tirâf edip müvekkilem mezbûre mahalle-i mezbûrede vâki‘ bir tarafı Mustafa Efendi odalarına ve bir tarafı Mehmed Efendi menziline ve iki tarafı tarîk-i âmma müntehî muhterik mülk menzil arsası ile içinde mevcûd enkāzını mezbûr Abdullah Ağa’ya kırk bin akçeye bâtten bey‘ ve teslîm ol dahi ber-vech-i muharrer iştirâ ve kabûl ve kabz ve tesellüm eyledikden sonra semeni olan meblağ-ı mezbûr kırk bin akçeyi yedinden bi’t-tamam ahz u kabz eyledim ba‘de’l-yevm arsa-i mezbûre enkāzı ile mezbûr Abdullah Ağa’nın mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâbi‘ aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Seyyid Cafer b. İbrahim, Mehmed Efendi el-imâm, Siyavuş Bey b. Abdullah, Ahmed Bey b. Mehmed, Abdülbaki Bey b., Mehmed Efendi el-imâm, Mehmed b. Abdülkerim, Mustafa b., Yusuf b. el-imâm, Mehmed Çelebi b. el-müezzin.