İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 514 Hüküm no: 591 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki karcıların ve şerbetçilerin, yazın kullanılacak karın ücreti ve nasıl dağıtılacağı hususunda anlaştıkları Karcılar hüccetidir. Mahmiye-i İstanbul’da hâlâ Karcıbaşı olan Mehmed Ağa b. Ebûbekir ve tâife-i mezbûreden Handan b. Abdullah ve el-Hâc Mustafa b. Mehmed ve Mustafa b. Sefer meclis-i şer‘de mahmiye-i mezbûrede vâki‘ Şerbetçiler Kethudâsı Ahmed Beşe b. Şükrullah ve Yiğitbaşıları Bayram b. Yakub ve ihtiyârlarından Musa b. Ali ve Mustafa b. Abdullah ve Abdülkerim b. Ebûbekir ve Halil Beşe b. Mehmed ve Ahmed Beşe b. Şaban ve sâirleri muvâcehelerinde her biri takrir-i kelâm edip işbu sene-i mübârekede eyyâm-ı sayfda isti‘mâl olunacak karın ber-vech-i âdet-i me’lûfe navl ve sâir harcı bizim uhdemize olup şerbetçiler dahi verdiğimizde karın akçesini bilâ-te’hîr bize îsâl ve teslîm etmek üzere kadîmden ta‘yîn olunan mikdârı karın her yükün yüz yirmi sekiz akçeye olmak üzere vakt ü zamanı ile mezbûrların dükkânlarına getirip onlar dahi kat‘ etdiğimiz her yükün başına yüz yirmi sekiz akçeyi bilâ-nizâ‘ ve lâ te‘allül bize teslîm edip koltukçulara ve bozacılara verilmek üzere terâzî eyledik, bu tarîk ile amel olunup şiddet-i harâret eyyâmında muzâyaka çekilmeye dediklerinde mezbûr[û]n şerbetçiler dahi ber-minvâl-i muharrer beynimizde ittifâk vâki‘ olmuşdur deyü tasdîk etdiklerinde [mâ-vaka‘a] bi’t-taleb ketb olundu. Fi’s-sâbi‘ aşer min-Şevval li-sene 1072. Şuhûdü’l-hâl: Ahmed b. Mahmud, Mehmed b. Ramazan, Veli b. Mahmud, Hasan b. Bayram, Ahmed b. Mehmed.