İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 536 Hüküm no: 622 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Beşe b. Abbas’ın varisleri eşi Fâyize bt. Arslan ile kardeşi Hasan Beşe b. Abbas arasındaki miras anlaşmazlığının sulh yoluyla halledildiği Sulh ve ibrâ. Vilâyet-i Anadolu’da Gönye sancağında vâki‘ Atina kasabası mahallâtından Derşilarit(?) mahallesi sâkinlerinden iken bundan akdem vefât eden Mahmud Beşe b. Abbas’ın verâseti zevce-i metrûkesi Fâyize bt. Arslan nâm hatun ile li-ebeveyn karındaşı Hasan Beşe b. Abbas’a münhasıra olduğu şer‘an zâhir ve müte‘ayyin oldukdan sonra müteveffâ-yı mezbûrun terekesinden mezbûre Fâyize Hatun’a isâbet ve intikāl eden rub‘ hisse-i şer‘iyesi ile müteveffâ-yı mezbûrun zimmetinde mütekarrir ve ma‘kūdün-aleyh seksen altun mehr-i mü’eccelini da‘vâ ve taleb ve ahz u kabza ve kendüye îsâle ve kabz [ve] îsâl mütevakkıf olduğu umûrun cümlesine ve lâzım gelirse sulh ve ibrâya tarafından sâbitü’l-vekâle vekîli olan karındaşı Derviş Beşe b. Arslan meclis-i şer‘de müteveffâ-yı mezbûrun karındaşı işbu bâ‘isü’l-vesîka mezbûr Hasan Beşe b. Abbas mahzarında bi’l-vekâle ikrâr ve takrîr-i kelâm edip bundan akdem müteveffâ-yı mezbûrun muhallefâtından müvekkilem mezbûre Fâyize Hatun’a intikāl ve isâbet eden rub‘ hisse-i şer‘iyesi ile seksen aded altun mehr-i mü’eccelini mezbûr Hasan Beşe’den muhallefâtına vaz‘-ı yed eylemişdi deyü bi’l-vekâle da‘vâ ve taleb eylediğimde ol dahi inkâr etmeğin beynimizde münâza‘ât-ı kesîre vukū‘undan sonra vesâtet-i muslihîn ve Müslimîn ile da‘vâ-yı mezbûreden benimle mezbûr Hasan Beşe elli riyâlî guruş üzerine inşâ-i akd-i sulh eyledikde ben dahi bi’l-vekâle sulh-ı mezbûru kabûl ve bedel-i sulh olan elli riyâlî guruşu yedinden müvekkilem mezbûre için ahz u kabz edip husûs-ı mezbûra müte‘allika da‘vâdan bi’l-vekâle mezbûr Hasan Beşe’nin zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. [Fi’]’s-sâbi‘ ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: İbrahim Beşe b. Yusuf, Hızır Beşe b. Mustafa, Ömer Beşe b. Ali, Ali Beşe b. Süleyman, İbrahim Beşe b. Hamza, İsmail Beşe b. Yusuf, Mehmed Çelebi b. Hacı, Ali Beşe b. Ahmed.