İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 535 Hüküm no: 621 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Hacı Mehmed ile oğlu Mehmed’in varisleri Hüseyin b. Mehmed ile Sâliha Hatun bt. Abdullah’ın, miras hususunda birbirlerini ibra ettikleri Mahmiye-i İstanbul’da Aksaray kurbünde Davud Paşa-yı Atîk mahallesinde sâkine iken vefât eden Hadîce bt. Hacı Mehmed nâm hatunun verâseti zevc-i metrûkü Hüseyin b. Mehmed’e ve vâlidesi Sâliha Hatun bt. Abdullah ve sadrî sagīr oğlu Mehmed’e münhasıra olup kable’l-kısme sagīr-i mezbûr Mehmed dahi vefât edip verâseti babası mezbûr Hüseyin ile anasının anası mezbûre Sâliha’ya münhasıra olduğu bi-tarîkı’l-münâsahati’l-mezkûre meseleleri yetmiş iki sehimden olup sihâm-ı mezbûreden elli üç sehmi mezbûr Hüseyin’e ve on dokuz sehmi mezbûre Sâliha’ya intikāl eylediği şer‘an zâhir oldukdan sonra mezbûr Hüseyin meclis-i şer‘de müteveffiyân-ı mezbûrânın terekelerine vâzı‘atü’l-yed idiği şer‘an sâbit olan işbu râfi‘atü’l-vesîka mezbûre Sâliha Hatun mahzarında ikrâr ve takrîr-i kelâm edip müteveffiyân-ı mezbûrânın terekelerinden ber-minvâl-i muharrer elli üç sehm hisseme isâbet eden iki beledî döşek ve bir yemenî yorgan ve bir yastık ve bir ocak perdesi ve bir yan keçesi ve bir orta keçesi ve bir cam tas ve bir şam‘dân ve bir güğüm ve bir bakraç ve bir mermer sini ve bir tencere ve bir sarı Yanbolu kebesi [ve bir] yahni tepsisi ve bir havanı mezbûre Sâliha Hatun yedinden alıp kabz edip husûs-ı irse müte‘allika cemî‘ da‘vâdan mezbûre Sâliha Hatun’un zimmetini ibrâ ve ıskāt eylediğimden sonra mezbûre Sâliha dahi üç bin nakd akçe nısf mehir, Tahtakale’de bir haffâf dükkânı ve Sultan Bâyezid Câmi‘i kurbünde Okçular içinde vâki‘ bir bâb leblebici dükkânı semenlerine ve zevcemin hayatında kabz eylediği Ankara’dan gelen sekiz bin akçe husûsuna müte‘allika cemî‘ da‘vâdan benim zimmetimi ibrâ-i âmm ile ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Ahmed Efendi b. Ahî, Mehmed Efendi el-imâm, Abdülmümin, Sinan b., Osman b. Mustafa, Ahmed b. Abdülcabbar, Veli b. Mahmud.