İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 538 Hüküm no: 626 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin hayatta iken Ataullah Çelebi’ye sattığı ve geri kiraladığı ev üzerindeki rehnin, bedeli terekesinden tahsil edildiği için kaldırıldığı Husûs-ı âti’l-beyânın mahâllinde tahrîri iltimâs olunmağın kıbel-i şer‘den Mevlânâ Mahmud b. İbrahim Çelebi irsâl olunup ol dahi mahmiye-i İstanbul’da Yarhisar mahallesinde sâkin kıdvetü’l-emâsil ve’l-ekârim el-Hâc Receb Ağa’nın menziline varıp zeyl-i vesîka[da] isimleri mastûr olan Müslimîn huzûrunda akd-i meclis-i şer‘-i şerîf eyledikde mahmiye-i mezbûrede Kâtib Hüsrev mahallesinde sâkin iken vefât eden Ataullah Çelebi’nin verâseti sulbî kebîr oğlu Mehmed’e ve sulbiye kebîre kızı Halime Hatun’a münhasıra olduğu şer‘an mütehakkık oldukdan sonra mezbûre Halime tarafından ikrâr-ı âti’l-beyâna vekîl olup bimâ-hüve nehcü’s-sübût vekâleti sâbite olan zevci es-Seyyid Abdülfettah b. es-Seyyid Hasan Efendi vekâleten ve mezbûr Mehmed Çelebi asâleten meclis-i ma‘kūd-ı mezbûrda mahmiye-i mezbûrede Monla Hüsrev mahallesinde sâkin iken bundan akdem vefât eden Mustafa Efendi’nin li-ebeveyn kız karındaşı ve hasran vârisesi Âişe Hanım tarafından husûs-ı âti’z-zikri tasdîke bimâ-hüve nehcü’s-sübût sâbitü’l-vekâle vekîli olan mefharu’l-kuzât Abdullah Efendi b. Abdülmümin mahzarında asâleten ve vekâleten ikrâr ve takrîr-i kelâm edip müteveffâ-yı mezbûr Mustafa Efendi babamız müteveffâ-yı merkūma hâl-i hayatında mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzilini bi-tarîkı’l-istiğlâl yetmiş bin akçeye bey‘ ve semenin kabz edip kable’l-ahz vefât etmekle müteveffâ-yı mezbûrun zimmetinde kalmış idi, mezbûre Âişe Hanım müteveffâ-yı mezbûrun hasran vârisesi ve terekesine vâzı‘atü’l-yed olmağla müteveffâ-yı merkūm Mustafa Efendi’nin terekesinden olmak üzere mârrü’z-zikr yetmiş bin akçe ile menzil-i mahdûd-ı mezbûr icâresinden hâsıl olan on iki bin akçe ki cem‘an seksen iki bin akçeyi vekâleten ve asâleten vekîl-i mezbûr Abdullah Efendi yedinden bi’t-tamam ve’l-kemâl ahz u kabz edip menzil-i mahdûd-ı mezbûru rehniyetden fekk eyledik dediklerinde Mevlânâ-yı mezbûr mahâllinde tahrîr ba‘dehû ma‘an irsâl olunan Muhzır Mustafa ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Umdetü’l-a‘yân el-Hâc Receb Ağa, Ali Ağa b. Mehmed, Ahmed Çelebi b. Abdullah, Mahmud b. el-Hâc Ahmed, Ali b. Mehmed, Mehmed Efendi b. Yusuf, Yahya Efendi b. Veli el-imâm, İbrahim el-Attar.