İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 539 Hüküm no: 627 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. İbrahim’in varisleri arasındaki anlaşmazlığın sulh yoluyla halledildiği Sulh ibrâ. Mahmiye-i İstanbul’da Molla Ahaveyn mahallesinde sâkin olup bundan akdem fevt olan İbrahim b. İbrahim nâm sagīrin verâseti vâlidesi Meryem bt. Abdullah nâm hatuna ve li-ümmin karındaşı Mehmed ile li-ebeveyn karındaşı Halil’e münhasıra olduğu şer‘an zâhir oldukdan sonra mezbûr Mehmed Çelebi meclis-i şer‘de mezbûre Meryem ile mezbûr Halil taraflarından sulh-ı âtîyi tasdîke vekîl olup zâtını ma‘rifet-i şer‘iye ile ârifân Mustafa Çelebi b. İbrahim ve Hüseyin Çavuş b. el-Hâc Hasan şehâdetleri ile vekâleti sâbite olan Mustafa Bey b. Sefer mahzarında tav‘an ikrâr ve takrîr-i kelâm edip li-ümmin karındaşım mezbûr İbrahim fevt oldukdan sonra mezbûr Mustafa Bey’in müvekkilleri kassâm defterinde ta‘yîn olunan on iki bin akçe muhallefâtın kabz eylediklerinden sonra südüs hissem olan iki bin akçemi mezbûrândan da‘vâ ve taleb eylediğimde beynimizde münâza‘ât-ı kesîre vâkı‘a olmuş idi, el-hâletü hâzihî südüs hissem da‘vâsından müvekkilân-ı mezbûrân benim ile bin beş yüz akçe üzerine sulh olup ben dahi sulh-ı mezbûru kabûl ve bedel-i sulh olan bin beş yüz akçeyi müvekkilân-ı mezbûrân yedlerinden alıp kabz edip defter-i kassâmda olan muhallefât ile hâric ez-defter muhallefât da‘vâsından mezbûrân Meryem Hatun ile Halil’i ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’s-sâbi‘ ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Hüseyin Efendi el-Burûsî, İhtiyâr Ahmed Efendi el-kādî, Abdi Çelebi b. Hüseyin, Baba Rasûl b. Rıdvan, Şükrullah b. Mustafa.