İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 541 Hüküm no: 630 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah b. Mustafa ile eski Alaiye Valisi Ali Paşa arasındaki haksız para tahsili anlaşmazlığının sulh yoluyla halledildiği Sulh, ibrâ. Vilâyet-i Anadolu’da Alâiye sancağı dâhilinde Düşenbe kazâsı kurâsından Elkebîr(?) nâm karye ahâlîsinden Abdullah b. Mustafa nâm kimesne meclis-i şer‘de bundan akdem mârrü’z-zikr sancağın vâlîsi olan emirü’l-ümerâi’l-kirâm, kebîrü’l-küberâi’l-fihâm zü’l-kadr ve’l-ihtirâm sahibü’d-devleti ve’l-ihtişâm el-muhtassu bi-mezîd-i inâyeti’l-Meliki’l-Allâm ‘izzetli Ali Paşa mahzarında tav‘an ikrâr ve takrîr-i kelâm edip târih-i kitâbdan bir sene mukaddem Alâiye sancağında vâlî iken devir akçesi nâmına on beş bin akçem alıp ba‘dehû ol akçeyi müşârün-ileyh Ali Paşa hazretlerinden da‘vâ ve taleb eylediğimde inkâr edip ben dahi ikāmet-i beyyine sadedinde iken tavassut-ı Müslimîn ile on beş bin akçe da‘vâsından an inkâr Paşa-[yı] müşârün-ileyh hazretleri üç bin akçe üzerine benim ile sulh olup ben dahi sulh-ı mezbûru kabûl ve bedel-i sulh olan meblağ-ı mezbûr üç bin akçemi yedinden alıp mâ‘adâsı da‘vâsından Paşa-yı müşârün-ileyh hazretlerini ibrâ-i âmm-ı kātı‘u’n-nizâ‘ ile ibrâ ve ıskāt eyledim; min-ba‘d benden veyâ vekîlimden mâ‘adâya müte‘allik da‘vâ sudûr ederse lede’l-hükkâm mesmû‘a ve makbûle olmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Mehmed Çavuş b. Musa el-mübâşir, Ali Çavuş b. Receb, Mustafa Efendi b. Mehmed, Muslu Efendi b. Mümin el-kādî, Hasan Çelebi b. Halil el-mukayyid, Kâtibü’l-hurûf Hüseyin Efendi.