İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 541 Hüküm no: 629 Orijinal metin no: [76b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un varislerinin miras paylaşımı hususunda sulh yoluyla anlaştıkları Sulh, ibrâ. Mahmiye-i İstanbul’da Zeyrek mahallesinde sâkine iken bundan akdem vefât eden Fâtıma bt. ( ) nâm hatunun verâseti zevc-i metrûkü râfi‘u’l-kitâb Emîrza Bey b. Abdullah’a ve oğlu Yahya b. Mustafa’ya münhasıra olduğu şer‘an zâhir ve müte‘ayyin oldukdan sonra mezbûr Yahya mahfil-i kazâda müteveffâ-yı mezbûrenin muhallefâtına vâzı‘u’l-yed olan mezbûr Emîrza Bey muvâcehesinde ikrâr ve takrîr-i kelâm edip vâlidem müteveffât-ı mezbûrenin akār [ü] menkūl cümle terekesinden benim hisse-i şer‘iyeme isâbet eden dört sehmden üç sehm hissem mukābelesinde tehâruc-i şer‘î tarîki üzere mezbûr Emîrza Bey benimle beş bin nakd-i râyicün fi’l-vakt akçe üzerine inşâ-i akd-i sulh etdikde ben dahi sulh-ı mezbûru kabûl ve bedel-i sulh olan meblağ-ı mezbûr beş bin akçeyi mezbûr Emîrza Bey yedinden tamamen ahz u kabz edip müteveffât-ı mezbûrenin akār [ü] menkūl cümle terekesine müte‘allika âmme-i de‘âvîden [de‘âvîden] mezbûr Emîrza Bey’in zimmetini ibrâ-i âmm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: Pîrî Çelebi b. Veli el-Bevvâb, Hacı Kadın Hamamcısı Hüseyin Ağa, Ahmed b. Mustafa, Ramazan b. Mahmud, Şükrullah b. Mustafa.