İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 542 Hüküm no: 632 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzunçarşı’daki bıçakçıların kethudalığına Mehmed Beşe b. Receb’in, yiğitbaşlığına da Ahmed Beşe b. Mehmed’in tayin edildiği Bıçakçılar Kethudâlığı ve Yiğitbaşılığı nasb hüccetidir. Mahmiye-i İstanbul’da vâki‘ erbâb-ı hirefden Uzunçarşı’da vâki‘ Bıçakçılar hirfetinin ihtiyârlarından el-Hâc Davud b. Mehmed ve Osman Bey b. Piyale ve Ömer Bey b. Piyale ve Abdüllatif Beşe b. Mahmud ve Veli Beşe b. İbrahim ve Nasuh Bey b. Mehmed ve Mehmed Çelebi b. Muslu ve Ahmed Beşe b. Abdullah nâm Müslümânlar ile Arutyun v. Sefer ve diğer Arutyun v. Koçı ve Sefer ve sâirler zimmî tâifesi meclis-i şer‘-i hatîrde işbu râfi‘u’l-kitâb Mehmed Beşe b. Receb ve Ahmed Beşe b. Mehmed nâm kimesneler mahzarlarında her biri takrîr-i kelâm edip kadîmü’l-eyyâmdan beri etrâfdan gelen metâ‘ımızın iki payın kethudâmız alıp mâ‘adâsını ale’s-seviye beynimizde kethudâmız tevzî‘ edegelip hâlâ kethudâmız ve yiğitbaşımız olmamağın hirfetimiz ashâbının mesâlihleri mu‘attala olmuşdur, eyle olsa cümlemizin muhtârı olan mezbûr Mehmed Beşe hirfetimiz ashâbına kethudâ ve merkūm Ahmed Beşe yiğitbaşı nasb ve ta‘yîn olunmak murâdımızdır dediklerinde intizâm-ı umûrları için mesûllerine muvâfakat olunup taraf-ı şer‘den mezbûr Mehmed Beşe kethudâ ve mezbûr Ahmed Beşe yiğitbaşı nasb olundukda onlar dahi kabûl ve hıdemâtını edâya müte‘ahhid olduklarında mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-işrîn min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Ahmed b. Mahmud, Osman Çelebi b. Abdullah Ser-bölük, Abdi Çelebi b. Hüseyin, Veli b. Mahmud, Mehmed b. Ramazan.