İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 543 Hüküm no: 633 Orijinal metin no: [77a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Abdi’nin, Ali b. Mustafa’nın kendisine emanet bıraktığı paranın zâyi olmasında kusuru bulunmadığına ve kendisinin almadığına dair yemin ettiği Yemîn. Vilâyet-i Rumeli’nde Arnavud İskenderiyesi sancağına tâbi‘ Ürgün(?) Kal‘ası sükkânından Ali b. Mustafa nâm kimesne mahfil-i kazâda Dergâh-ı âlî yeniçerilerinin On üçüncü sekbânlara mahsûs oda ahâlîsinden işbu bâ‘isü’l-kitâb İbrahim Beşe b. Abdi nâm râcil mahzarında üzerine da‘vâ ve takrîr-i kelâm edip târih-i kitâbdan sekiz gün mukaddem mezbûr İbrahim Beşe yedine bir beyâz kemer içinde mevzû‘ sekiz bin üç yüz yirmi akçemi bi-tarîkı’l-emâne vaz‘ ve teslîm eylemiş idim, hâlâ taleb ederim dedikde gıbbe’s-suâl mezbûr İbrahim Beşe cevâbında fi’l-vâki‘ târih-i mezbûrda müdde‘î-i mezbûr adedi ma‘lûmumuz değil beyâz kemer içinde mevzû‘ akçesini hıfz için benim yedime emânet vaz‘ ve teslîm edip ben dahi odamda sepet sandığım içinde vaz‘ edip birkaç gün mürûrundan sonra ol sepet sandığın açmak murâd eylediğimde kilidi kırık bulunup içinde olan kemeri dahi akçesiyle bilâ-te‘addî zâyi‘ olmuşdur deyicek mezbûr İbrahim Beşe emîn olup yemîn ile musaddık olmağın fi’l-vâki‘ zikrolunan kemer ile akçeyi kendi ketm ve ahz ü ihfâ etmeyip ve te‘addî ve taksîr etmediğine mezbûr İbrahim Beşe’ye yemîn teklîf olundukda ol dahi alâ-hasebi’l-mesûl yemîn billâhi te‘âlâ eylemeğin mûcebince müdde‘î-i mezbûr Ali bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’s-sâmin aşer min-Şevvali’l-mükerrem li-sene isneyn ve seb‘în ve elf. Şuhûdü’l-hâl: el-Hâc Mustafa Beşe b. Mehmed Ser-oda, Hüseyin Beşe b. Âdilcan, Ahmed b. Mahmud, Hüseyin b. …?, Veli b. Mahmud, Mustafa Çelebi b. İsa, Rasûl b. Rıdvan, Hasan b. Mustafa, Mehmed b. Ramazan.