İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 550 Hüküm no: 644 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayıntab’daki Dülük Baba Zaviyesi’nin mahsulünü tahsil etmek üzere mütevellisi tarafından Monla Ahmed b. Mahmud’un vekil tayin edildiği Vekâlet. Vilâyet-i Anadolu’da vâki‘ medîne-i Ayıntab kazâsı muzâfâtından Dülük Baba nâhiyesine tâbi‘ Dülük Baba Zâviyesi’nin berat-ı şerîf ile zâviyedârı ve evkāfına bi’l-fi‘il mütevellîsi olan mahmiye-i İstanbul’da ( ) mahallesinde sâkin Abdülaziz Efendi b. Ali meclis-i şer‘de bâ‘isü’l-kitâb medîne-i mezkûrede Bostancı Câmi‘i mahallesinde sâkin Bînamazcı Monla Ahmed b. Mahmud nâm kimesne mahzarında ikrâr ve takrîr-i kelâm edip nâhiye-i mezbûre sınırında vâki‘ zâviye-i merkūme evkāfından Dülük Baba mezrâ‘ası demekle ma‘rûf mezrâ‘anın bundan akdem bin yetmiş ve bin yetmiş bir senelerinde vâki‘ olan a‘şâr-ı şer‘iye ve rüsûm-ı örfiye ve sâir mahsûlâtını ahz u kabza gāib ani’l-meclis medîne-i mezkûre sükkânından Abdurrahman Efendi b. Hamza nâm kimesneyi tarafından vekîl ve nâib-i menâb nasb ü ta‘yîn eylemişdim. Hâlâ seneteyn-i mezbûreteynde minvâl-i muharrer üzere mezrâ‘a-i mezbûre mahsûlâtından zimmetinde bâkī kalan mahsûlâtı mezkûr Abdurrahman Efendi’den da‘vâ ve talebe ve ahz u kabza ve bana irsâle ve ahz [ve] irsâle[in] mütevakkıf olduğu umûrun küllîsine ve ve işbu bin altmış iki senesinde mezrâ‘a-i mezbûrenin ber-[vech-i] meşrûh vâki‘ olan a‘şâr-ı şer‘iye ve rüsûm-ı örfiye ve sâir mahsûlâtını dahi kezâlik ahz u kabza ve zikrolunan zâviyedârlık ve tevliyet-i merkūmeyi zabt ü tasarrufa mezbûr Monla Ahmed’i tarafımdan vekâlet-i mutlaka ile vekîl ve nâib-i menâb nasbeyledim ol dahi vekâlet-i mezbûreyi kabûl ve hizmet-i lâzımesini edâya ta‘ahhüd eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-selhi Şevvali’l-mükerrem li-sene isneteyn ve seb‘în ve elf. Şuhûdü’l-hâl: Ali b. Osman el-Ayıntabî, Mehmed b. Minnet Ayıntabî, Şükrullah b. Mustafa, Abdi Çelebi b. Hüseyin.