İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 550 Hüküm no: 643 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Abdullah’ın Meryem bt. Abdullah’ta iki bin akçe alacağı olduğu İkrâr, edâ ve teslîme tenbîh. Dergâh-ı âlî yeniçerilerinin on birinci sekbânlar cemâ‘atine mahsûs oda ahâlîsinden bâ‘isü’l-vesîka Ahmed Beşe b. Abdullah nâm râcil meclis-i şer‘de Meryem bt. Abdullah nâm mühtediye muvâcehesinde da‘vâ ve takrîr-i kelâm edip mezbûr Meryem zimmetinde cihet-i karz-ı şer‘îden iki bin akçe hakkım olmağın hâlâ meblağ-ı mezkûru mezbûre Meryem’den taleb ederim suâl olunsun dedikde gıbbe’s-suâl mezbûre Meryem cevâbında fi’l-vâki‘ cihet-i karz-ı şer‘îden zimmetinde müdde‘î-i mezbûr Ahmed Beşe’nin iki bin akçe hakkı olduğunu bi-tav‘ihâ ikrâr etmeğin ikrârı üzere meblağ-ı mezkûr iki bin akçeyi müdde‘î-i merkūm Ahmed Beşe’ye edâ ve teslîme mezbûre Meryem Hatun’a tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Ali Beşe b. Mustafa el-mübâşir, İbrahim Beşe ser-oda-i mezbûre, Mustafa Çelebi b. Baba Ali el-muhzır, Abdi Çelebi b. Hüseyin.