İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 551 Hüküm no: 646 Orijinal metin no: [78b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirih v. Manuk’un Cerrahbaşı İshak Bey mahallesindeki menzilini Hüseyin Çelebi b. Ahmed’e sattığı Mülknâme. Mahmiye-i İstanbul’da Kum[kapı] dâhilinde Cerrâhbaşı İshak Bey mahallesinde mütemekkin Kirih veled-i Manuk nâm Ermeni meclis-i şer‘de râfi‘u’l-kitâb Hüseyin Çelebi b. Ahmed nâm kimesne mahzarında ikrâr ve takrîr-i kelâm edip silk-i mülkümde olup mahalle-i mezbûrede vâki‘ bir tarafdan İsmail Ağa menziline ve bir tarafdan Receb Bey mülküne ve bir tarafdan Hasan Beşe mülküne ve bir tarafdan tarîk-i hâs ile mahdûd yüz on iki zirâ‘ arsa üzerinde mebnî bir bâb fevkānî ve bir bâb tahtânî odaları ve havluyu ve kenîfi müştemil ve mezbûr Hasan Beşe ile müşterek taş duvarı ve mezbûr Receb Bey ile iştirâk tuğla duvarı ve mezbûr İsmail Ağa tarafında damlalığı hâvî menzilimi bi-cümleti’t-tevâbi‘ ve’l-levâhık mezbûr Hüseyin Çelebi’ye râyic fi’l-vakt yirmi altı bin akçeye bâtten bey‘ ve teslîm ol dahi ber-minvâl-i muharrer iştirâ ve tesellüm ve kabûl eyledikden sonra semeni olan meblağ-ı mezbûru tamamen mezbûr Hüseyin Çelebi yedinden alıp kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmî min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Seyyid Ali Efendi b. es-Seyyid Mehmed el-imâm, Abdurrahman Efendi b. Mehmed el-müezzin, Veli Efendi b. Mehmed, Halil Efendi el-müezzin, Mustafa Çelebi berber, Hacı Bayram b. Mahmud.