İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 552 Hüküm no: 647 Orijinal metin no: [78b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 23. Yeniçeri Cemaati Odası’na vakfedilen paradan ölen Bostancı Mehmed Beşe’nin iki bin akçe borç para aldığına dair vakfın mütevellisi Osman Beşe’nin yemin ettiği Yemîn. Dergâh-ı âlî yeniçerilerinden yirmi üç cemâ‘atına mahsûs odanın odabaşısı ve oda-i mezbûrenin mühimmâtı için mevkūfe nükūda bi’l-fi‘il mütevellî olan râfi‘u’l-kitâb Mehmed Beşe b. Himmet meclis-i şer‘de Vilâyet-i Anadolu’da İznikmid kasabası mahallâtından olup Rumeli’nde İştib kazâsına tâbi‘ Koçana nâm karyede bundan esbak vefât eden Bostânî Mehmed Beşe nâm râcilin sagīre kızı Havva’nın tesviye-i umûruna vasî olmağla müteveffâ-yı mezbûrun metrûkâtına vaz‘-ı yedi sâbit olan Fâtıma Hatun bt. Mustafa mahzarında da‘vâ ve takrîr-i kelâm edip müteveffâ-yı mezbûra hâl-i hayatımda mütevellîsi olduğum vakf-ı mezbûr mâlından olmak üzere benden akdem vakf-ı mezbûra mütevellî olan hazır bi’l-meclis Osman Odabaşı yedinden iki bin akçe alıp kable’l-edâ vefât edip metrûkâtına vasiyye-i mezbûre Fâtıma vaz‘ etmeğin suâl olunup alıverilmek matlûbumdur dedikde gıbbe’s-suâl vasîyy-i mezbûr cevâbında müdde‘î-i mezbûrun müdde‘âsını inkâr edicek mütevellî-i mezbûr Mehmed Beşe’den müdde‘âsını mübeyyine beyyine taleb olundukda udûl-i ricâl-i Müslimînden olup oda-i mezbûre ahâlîsinden İbrahim Beşe b. Ali ve Muslı Beşe b. Hüseyin nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı mezbûr Bostancı Mehmed Beşe bizim huzûrumuzda bundan akdem vakf-ı mezbûra mütevellî olan işbu Osman Beşe yedinden vakf-ı mezbûr mâlından olmak üzere iki bin akçe ahz u kabz eyledi idi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra meblağ-ı mezbûru küllen veyâ ba‘zan ahz u istifâ veyâ âhara havâle veyâ turûk-ı şer‘iyeden bir tarîkle müteveffâ-yı mezbûrun zimmetini ibrâ etmediğine mütevellî-i sâbık-ı mezbûr Osman Beşe’ye yemîn teklîf olundukda ol dahi alâ-hüve’l-mesûl halfü billâhi’l-aliyyü’l-azîm etmeğin mûcebiyle ba‘de’l-hükm mâ-vaka‘a bi’t-taleb ketb olundu. Fi’s-sâmin ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Osman Beşe b. Hızır, Osman b. İlyas, Hızır Beşe b. Mustafa, Mustafa Beşe b. Hüseyin, Abdi b. Hüseyin.