İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 553 Hüküm no: 648 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 39. Yeniçeri Ağa Bölüğü Odabaşısı Mehmed’in Aydın’a bağlı Alaşehir kazasında tasarrufunda olan tarlalarının yarı tasarruf hakkını Sinan Efendi’ye devrettiği Taslît-i tarla. Dergâh-ı âlî yeniçerilerinin otuz dokuzuncu ağa bölüğüne mahsûs olan odada sâbıkā odabaşı olan Mehmed Odabaşı meclis-i şer‘de bâ‘isü’l-kitâb Sinan Efendi b. ( ) mahzarında ikrâr ve takrîr-i kelâm edip Vilâyet-i Anadolu’da Aydın Sancağı’nda Alaşehir kazâsına tâbi‘ Batanca nâm hâs sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd olup mukaddemâ Küçük Osman Ağa’dan bedel-i ma‘lûm ile tefevvüz ve kabûl eylediğim tarlaların nısfının hakk-ı tasarrufunu sahib-i arz ma‘rifetiyle altmış bin fıddî râyic fi’l-vakt akçe bedel mukābelesinde mezbûr Sinan Efendi’ye tefvîz edip ol dahi tefevvüz ve kabûl eyledikden sonra bedel-i tefvîz olan altmış bin akçeden otuz bin akçesini mezbûr Sinan Efendi yedinden hâlâ ahz u kabz edip meblağ-ı bâkī otuz bin akçeyi târih-i kitâbdan bir sene tamamına değin tecîl edip ol dahi ecel-i mezbûru kabûl eyledikden sonra zikri mürûr eden tarlaları mahâllinde zabt u tasarrufa mezbûr Sinan Efendi’yi taslît eyledim ba‘de’l-yevm zikrolunan nısf tarlalar mezbûr Sinan Efendi’nin hakk-ı müfevvazıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Fahrü’l-kuzât es-Seyyid Mehmed Efendi, Ömer Efendi el-kādî, İbrahim Efendi el-kâtib, Mustafa Çelebi b. Hacı Musa, Sunullah Efendi b. Süleyman, Abdurrahman Ağa b. Mustafa, Mehmed b. Hüseyin, el-Hâc Hüseyin b. Abdülkerim, Mahmud Efendi b. İbrahim.