İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 555 Hüküm no: 650 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstaver v. Niko’nun Yani v. Lakari’den 2.600 akçe alacağı olduğuna dair yemin ettiği Yemîn. İşbu bâ‘isü’s-sifr kasab tâifesinden İstaver v. Niko nâm zimmî mahfil-i kazâda Yani v. Lakari nâm zimmî muvâcehesinde üzerine da‘vâ ve takrîr-i kelâm edip mezbûr Yani kana[ra]dârım olmağla yedinden müşterâ ve makbûz lahm bahâsından ba‘de-küllî hesâbın iki bin altı yüz akçe hakkım olup taleb eylediğimde vermede ta‘allül eder suâl olunup alıverilmesi matlûbumdur dedikde gıbbe’s-suâl mezbûr Yani cevâbında kazıyye minvâl-i muharrer üzere olduğunu ikrâr lâkin meblağ-ı mezbûru tamamen müdde‘î-i mezbûra def‘ ü teslîm eyledim deyü def‘le mukābele edecek gıbbe’l-istintâk ve’l-inkâr mezbûr Yani’den def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka mezbûr Yani yedinden meblağ-ı mezbûr iki bin altı yüz akçeyi ahz u kabz etmediğine müdde‘î-i mezbûr İstaver’e yemîn teklîf olundukda ol dahi alâ-vefki’l-mesûl yemîn billâhillezî enzele’l-İncîle alâ-İsa aleyhisselâm etmeğin mûcebince meblağ-ı mezbûr iki bin altı yüz akçeyi müdde‘î-i merkūma teslîme mezbûr Yani’ye tenbîh olunup mâ-vaka‘a bi’t-taleb ketb olundu. Fi’r-râbi‘ ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Mustafa Çelebi b. Ahmed, Ahmed b. Abdülcabbar, Abdi Çelebi b. Hüseyin, Rıdvan b. Abdullah