İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 555 Hüküm no: 651 Orijinal metin no: [79a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehremini Mustafa Efendi’nin İbrahim Bey’den 40.000 akçe alacağı olduğuna dair yemin ettiği Yemîn. Hâlâ şehremini olan işbu sahibü’l-kitâb umdetü’l-a‘yân zübdetü’l-erkân Mustafa Efendi dîvân-ı sadrazamîde ma‘kūd mahfil-i kazâda İbrahim Bey b. ( ) nâm bostânî mahzarında da‘vâ ve takrîr-i kelâm edip mezbûr İbrahim Bey zimmetinde deyn-i şer‘îden kırk bin akçe hakkım vardır hâlâ taleb ederim suâl olunsun dedikde gıbbe’s-suâl mesfûr cevâbında fi’l-vâki‘ müdde‘î-i mezbûra ber-vech-i muharrer kırk bin akçe deynim var idi lâkin meblağ-ı mezbûru hâlâ Rûznâmeci Mustafa Efendi’nin kethudâsı Ebûbekir Bey yediyle kendiye irsâl ve teslîm eyledim deyicek gıbbe’l-istintâk ve’l-inkâr mezbûr İbrahim Bey’den müdde‘âsına muvâfık beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ meblağ-ı mezbûru merkūm Ebûbekir yediyle ahz u kabz etmediğine merkūm Şehremîni Mustafa Efendi’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince meblağ-ı mezbûr kırk bin akçeyi müdde‘î-i mezbûra teslîme mezbûr İbrahim Bey’e tenbîh olunup mâ-vaka‘a bi’t-taleb ketb olundu. Fi’l-yevmi’r-râbi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Umdetü’l-emâcid ve’l-ekârim Çavuşbaşı İbrahim Ağa, Ramazan Çavuş b. ( ), Mehmed Bey b. Ali, Mehmed Ağa ser-muhzırân, Ali el-kâtib.