İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 557 Hüküm no: 654 Orijinal metin no: [79b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihaliçli Mustafa b. Mehmed’in hayvanlarını gaspeden Hasan Çelebi b. Hüseyin ile 900 akçe üzerine sulh olduğu Sulh, ibrâ. Fî’l-asl kazâ-i Mihaliç’de Köse Rasûl karyesi ahâlîsinden olup hâlâ mahmiye-i İstanbul’da müsâfiren sâkin olup cüssesinin bulûğa tahammülü olup bulûğuna mu‘terif olan Mustafa b. Mehmed nâm şâbb-ı emred meclis-i şer‘de yine karye-i merkūme ahâlîsinden Hasan Çelebi b. Hüseyin mahzarında ikrâr ve takrîr-i kelâm edip bundan akdem mezbûr Hasan Çelebi bir karasığır öküzüm ile bir yanı buzağlı ineğimi gasben ahz edip mevcûd olmağla ol öküz ile ineği mezbûrdan da‘vâ ve taleb eylediğimde mezbûr Hasan Çelebi ikrâr eyledikden sonra almak sadedinde iken beynimize muslihûn tavassut edip ol öküz ile inek da‘vâsından an-ikrâr mezbûr Hasan Çelebi ile dokuz yüz akçe üzerine suâl olup ol dahi sulh-ı mezbûru kabûl ve bedel-i sulh olan meblağ-ı mezbûr dokuz yüz akçeyi yedinden alıp kabz edip husûs-ı mezbûra müte‘allika da‘vâdan mezbûr Hasan Çelebi’yi ibrâ-yı âm ile ibrâ ve ıskāt eyledim dedikde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fî’s-sâmin ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Hüseyin Beşe b. Ali ser-oda, Mehmed Beşe b. Mustafa aşcı, Nasuh Beşe b. Yusuf, Mustafa b. Mehmed, Hüseyin Efendi b. Veli kâtibü’l-hurûf.