İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 557 Hüküm no: 653 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ebubekir’in mehir ve nafaka hususunda boşandığı kocası Mehmed Bey b. Abdullah’ın zimmetini ibra ettiği İbrâ. Mahmiye-i Edirne’de Selçuk mahallesi sâkinelerinden Âişe bt. Ebûbekir nâm hatun tarafından husûs-ı âti’l-beyânı da‘vâ ve taleb ve lâzım gelirse sulh ve ibrâya vekîl olup vekâleti bimâ-hüve nehcü’s-sübût şer‘an vekâleti sâbite olan Mehmed Çelebi b. Abdullah nâm bevvâb-ı sultanî meclis-i şer‘de müvekkile-i mezbûrenin zevc-i mutallıkı işbu râfi‘u’l-kitâb Mehmed Bey b. Abdullah mahzarında bi’l-vekâle ikrâr ve takrîr-i kelâm edip mezbûr Mehmed Bey müvekkilem mezbûrenin bundan akdem zevci olup talâk-ı bâyin ile tatlîk eylediğinde zimmetinde mütekarrir ve ma‘kūdün-aleyh olan bin akçe mehr-i mü’eccel ve tatlîk etmezden mukaddem yevmî altışar akçe nafaka-i mefrûzasından izni ile müctemi‘ olan bin sekiz yüz akçeyi vekâletim hasebiyle mezbûr Mehmed Bey’den da‘vâ ve taleb eylediğimde beynimizde münâza‘ât-ı kesîre vâkı‘a olmuşdu el-hâletü hâzihî beynimize muslihûn ve Müslimûn tavassut edip beş yüz nakd-i râyic fî’l-vakt akçeye sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr beş yüz akçeyi müvekkilem için mezbûr Mehmed Bey yedinden tamamen alıp kabz eyledim ba‘de’l-yevm husûs-ı mezbûra müte‘allik kalîl ve kesîr da‘vâdan mezbûr Mehmed Bey’i vekâleti hasebiyle ibrâ ve ıskāt eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Abdülbaki Çelebi b. Mehmed, Zülfikar Bey b. İsmail, Mustafa b. Ali, Abdi Çelebi b. Hüseyin.