İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 571 Hüküm no: 670 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocapaşa ve etrafında bulunan Yahudilerin yanan evlerinin arsasını Valide Sultan’a sattıkları Hüccet-i mübâya‘a-i hâne-i muhterika-i Yahûdiyân der-İstanbul etrâf-ı Hocapaşa. Mahmiye-i İstanbul’da ( ) mahallesi sükkânından el-Hâc Mehmed b. el-Hâc Himmet nâm kimesne meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın sahibesi Sultanü’l-muhadderât bürhânü’l-mu‘azzamât aliyyetü’z-zât safiyyetü’s-sıfât zübdetü’l-mu‘azzamât umdetü’l-muvakkarât zâtü’l-aliyy ve’s-sa‘âdât ismetü’l-Müslimîn ve’l-Müslimât Âişetü’z-zaman Fâtımatü’d-deverân Belkısü’l-âvân Hazret-i Vâlide Sultan dâmet ismetuhâ ve zâdet iffetuhâ taraf-ı bâhirü’ş-şereflerinden husûs-ı câ’i’z-zikre vekîl-i şer‘îleri olup kethudâlığı şeref-i hizmeti ile şeref-yâb olan umdetü ashâbi’l-izzi ve’l-ikbâl kıdvetü erbâbü’l-câh ve’l-celâl câmi‘ü’l-mehâmid ve’l-mekârim hâvî’d-devleti ve’l-ekârim zü’l-kadri’r-refî‘ ve’l-câhi’l-menî‘ ‘izzetlü Hasan Ağa mahzarında tâyi‘an ikrâr edip mahmiye-i mezbûrede Hocapaşa ve etrâfında vâki‘ mahallâtda mütemekkin Yahûd tâifesinin bin yetmiş Zilka‘desi’nin on altıncı gününde vâki‘ olan harîk-i kebîrde muhterik olan hânelerden mülk evlerini Müslimîne bey‘ ve vakf olanı kezâlik Müslimîne tefvîz etmeleri bâbında fermân-ı âlî sâdır olmağla tâife-i mezbûrenin muhterik olan kenîse-i kadîmelerinin arsasının mâliki olmamağla cânib-i mîrîye â’id olduğuna fetvâ-yı şerîfe olmağın mahmiye-i mezbûrede Rüstempaşa Câmi‘-i Şerîfi yanında Papasoğlu Hânı kurbünde vâki‘ tâife-i mezbûreden Zeytun Cemâ‘ati’ne mahsûs arsanının bir mikdârının Ayasofya-i kebîr Vakfı’na senede elli beş akçe mukāta‘ası olup bir tarafdan Poloharon ve Harun nâm Yahûdiler dükkânlarına ve bir tarafdan Hayed ve Bünyamin nâm Yahûdiler mahzenlerine ve bir tarafdan Nikola ve Yani nâm zimmîler değirmenlerine ve ba‘zan Ahmed Ağa nâm kimesne mülküne ve bir tarafdan tarîk-i âmma müntehî üç su kuyusunu ve bir ayazmayı müştemil tûlen ve arzan be-hesâb-ı şatrancî bin yetmiş yedi buçuk zirâ‘ kenîse arsası dahi fetvâ-yı şerîfe mûcebince cânib-i mîrîye â’id olmağın bundan akdem arsa-i mezkûreyi ba‘de’l-müzâyedeti’l-mu‘tâde semen-i misli ile bundan akdem şıkk-ı evvel defterdârı olan Hüseyin Paşa hazretleri cânib-i mîrîden kırk bin akçe semene bana bey‘ ve semen-i mezbûru yedimden mîrî için ahz u kabz etmekle arsa-i mahdûde-i mezkûre ilâ-hîni’l-akd benim taht-ı tasarrufumda idi. El-hâletü-hâzihî arsa-i mahdûde-i merkūmeyi vekîl-i mûmâ-ileyhe elli bin râyic fi’l-vakt akçeye bey‘ ve teslîm ol dahi müvekkilesi Sultan-ı müşârün-ileyhâ hazretleri için iştirâ ve tesellüm ve kabûl etdikden sonra semeni olan meblağ-ı mezbûru bi’t-tamam vekîl-i mûmâ-ileyh Hasan Ağa yedinden alıp kabz eyledim ba‘de’l-yevm arsa-i mezbûrede alâka ve medhalim kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ aşer min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: es-Sâbıkūn.