İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 597 Hüküm no: 689 Orijinal metin no: [87b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Rumbey’in muhâlaa yoluyla kocası Hüseyin Beşe b. Abdullah’tan boşandığı Hul‘. Mahmiye-i İstanbul’da Kumkapısı kurbünde Nişancı mahallesinde sâkine Meryem bt. Rumbey nâm zimmîye meclis-i şer‘-i hatîr-i lâzımü’t-tevkīrde zevci işbu bâ‘isü’l-kitâb Hüseyin Beşe b. Abdullah mahzarında ikrâr ve takrîr-i kelâm edip zevcim mezbûr Hüseyin Beşe [ile] beynimizde mütekarrir ve ma‘kūdün-aleyh olan iki bin akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere ve bedel-i hul‘ olmak üzere silk-i mülkümde münselik eşyâmdan kendüye def‘ ü teslîm eylediğim kırk iki miskāl altından masnû‘ üç aded bilezik ve üç yüz akçe kıymetli bir çift altın küpe ve bir mâ’î ve dârâyî kaftan ve bir al çiçekli kemhâ kaftan üzerine mezbûr Hüseyin ile muhâla‘a-i sahîh-i şer‘iye ile muhâla‘a edip ol dahi hul‘-ı mezbûru kabûl etdikden sonra zevciyete ve gayra [88a] müte‘allika âmme-i de‘âvîden her birimiz âharın zimmetini ibrâ ve ıskāt eyledik dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’l-râbi‘ ve’l-işrîn min-Şevvali’l-mükerrem li-sene isneteyn ve [seb‘în] ve elf. Şuhûdü’l-hâl: Fahrü’l-a‘yân Şaban Ağa b. Mehmed, Hüseyin b. Mahmud, Hasan Beşe b. Abdullah, İbrahim Bey b. Mustafa, Hüseyin b. el-Hâc Mehmed, Veli b. Mahmud, Resûl b. Rıdvan.