İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 596 Hüküm no: 688 Orijinal metin no: [87b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed’in tasarrufunda olan vakıf dükkânlar kızı Fâtıma’ya intikal ettiğinden vakıf tarafından müdahale edilmemesi Vilâyet-i Anadolu’da İbradi kasabası sükkânından iken bundan akdem vefât eden Mehmed b. el-Hâc Memi’nin sulbiye kebîre kızı ve hasran vârisesi Fâtıma Hatun tarafından husûs-ı âti’l-beyânı da‘vâ ve talebe sâbitü’l-vekâle vekîli olan işbu bâ‘isü’l-kitâb es-Seyyid Hamdi [b.] İsa nâm kimesne mahfil-i kazâda mahmiye-i İstanbul’da merhûm Kürkcübaşı Evkāfı’na bi’l-fi‘il mütevellî olan Osman Çelebi b. Derviş Mehmed mahzarında üzerine bi’l-vekâle da‘vâ ve takrîr-i kelâm edip müvekkilem mezbûre babası müteveffâ-yı mezbûrun mahmiye-i mezbûrede Bitpazarı kurbünde vâki‘ mezbûr Kürkcübaşı Evkāfı’ndan olup icâre-i mu‘accele ve mü’eccele-i ma‘lûmeteyn ile iki bâb ve nısf dükkânı tasarrufunda iken fevt olup zikrolunan dükkânlar intikāl-i âdî ile müvekkilem mezbûre Fâtıma’ya intikāl etmiş iken mütevellî-i mezbûr fuzûlen zikri mürûr eden dükkânları zabteylemişdir hâlâ suâl olunsun dedikde gıbbe’s-suâl merkūm Osman Çelebi cevâbında fi’l-vâki‘ mütevellîsi olduğum evkāf-ı mezbûre müsakkafâtından zikrolunan iki bâb dükkân ve nısf dükkân müteveffâ-yı mezbûr Mehmed’in tasarrufunda olup bilâ-veled vefât etmekle tasarrufunda olan dükkânlar vakfa intikāl eylemişdir hâlâ ona binâen bi’t-tevliye vaz‘-ı yed ederim deyü vaz‘-ı yedini ikrâr lâkin merkūme Fâtıma müteveffâ-yı merkūmun sulbiye kızı ve mezbûr es-Seyyid Mehmed dahi mezbûre Fâtıma tarafından vekîl olduğunu inkâr edicek mezbûr[dan] müdde‘âsını mübeyyine beyyine taleb olundukda udûl-i Müslimînden olup kasaba-i mezbûre sükkânından es-Seyyid Mustafa Çelebi b. el-Hâc Mehmed ve Ömer Çelebi b. el-Hâc Ali nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ merkūme Fâtıma müteveffâ-yı merkūm Mehmed’in sulbiye kızı olup husûs-ı mezbûru da‘vâya bizim huzûrumuzda merkūm es-Seyyid Mustafa Çelebi’yi vekîl nasb ve ta‘yîn eyledi biz bu husûsa bu vech üzere şâhidleriz şehâdet dahi ederiz her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın mûcebince mütevellî-i mezbûr bi-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Veli Çelebi b. Abdi, Abdülkerim b. ( ), Kasab Mustafa b. Mehmed, Mehmed Çelebi b. Mustafa.