İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 598 Hüküm no: 691 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram Beşe b. Mehmed’in Ahmed Çelebi b. Mehmed’de olan alacağının tamamını tahsil ettiği Vürûd-ı nakl. Hâlâ Tatarpazarı kādısı olan Halil Efendi [b.] İbrahim kıbelinden imzâsıyla mümzâ ve hatmi ile mahtûm ve târih-i kitâb senesi şehr-i Rebî‘ülevvel’inin yirmi dördüncü günü târih ile müverrah kitâb-ı nakli vârid olup mazmûnu işbu rafi‘u’l-kitâb Bayram Beşe b. Mehmed nâm râcilden vech-i âtî üzere da‘vâ-yı sahîh-i şer‘iye ile mesbûk istişhâd-ı şer‘î sudûrundan sonra udûl-i Müslimînden Ali Beşe b. Ali b. Mahmud ve Mustafa b. Mehmed b. Ahmed nâm kimesneler nakl ve tahvîl için mahâll-i cerh ve tahvîle hâzırân olup müsteşhed-i mezbûr Bayram Beşe hâlâ medîne-i Ebî Eyyûb-i Ensârî mahallâtından Taşcılar mahallesinde sâkin Ahmed Çelebi b. Mehmed nâm kimesneye bizim huzûrumuzda yüz kıt‘a esedî guruş ile üç bin akçe ikrâz ve teslîm ol dahi iktirâz ve kabz eyledi hâlâ meblağayn-i mezbûreyni merkūm Ahmed Çelebi’den müsteşhed-i mezbûr için hak ve ahz vardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olduğunu hâvî olmağın kitâb-ı merkūm mezbûr Bayram Beşe taleb ile merkūm Ahmed Çelebi muvâcehesinde feth [ü] kırâet ve istintâk olundukda mezbûr Ahmed Çelebi meblağayn-i mezbûreyni iktirâzını ve kitâb-ı mezbûrun mevlânâ-yı mûmâ-ileyh kıbelinden vürûdunu bi’l-külliye inkâr edicek mezbûr Bayram Beşe’den müdde‘âsına muvâfık beyyine taleb olundukda zeyl-i kitâbda isimleri mastûr olan şuhûd-ı tarîkden el-Hâc Mustafa b. Abdullah ve Fazıl Beşe b. Abdülkerim ve Ahmed b. Mustafa nâm kimesneler li-ecli’ş-şehâde meclis-i şer‘a hâzırân olup zeylinde olan hat ve zahrında olan hâtem mûmâ-ileyh Halil Efendi b. İbrahim kıbelinden vârid olup mevlânâ-yı mezbûrundur bizim huzûrumuzda imzâlayıp ve hâtem urup hatt ü hâtemine bizi işhâd eyledi biz bu husûsa bu vech üzere şâhidleriz şehâdet dahi ederiz deyü her [bir]leri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra mûcebince meblağayn-i mezbûreyn yüz kıt‘a esedî guruş ile üç bin akçeyi mezbûr Bayram Beşe’ye teslîme merkūm Ahmed Çelebi’ye tenbîh olundukdan sonra mezbûr Bayram Beşe meclis-i mezbûrda merkūm Ahmed Çelebi mahzarında ikrâr ve i‘tirâf edip teslîmine tenbîh olunan meblağ-ı mezbûr yüz esedî guruş ile üç bin akçeyi mezbûr Ahmed Çelebi yedinden bi’t-tamam ahz u kabz eyledim zimmetinde bir akçe ve bir habbe kalmadı dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Mehmed Çavuş b. ( ) el-mübâşir, Abdi b. Hüseyin, Hasan b. Bayram, Rıdvan b. Abdullah, Resûl b. Rıdvan, Hasan b. Mehmed, Ahmed b. Mehmed.