İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 620 Hüküm no: 716 Orijinal metin no: [91a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatih Sultan Mehmed Han Vakfı’na ait olup yanan Alacahamam’ı kendi parasıyla tamir ettiren hamamın avukatı Hacı Ali b. Mustafa’nın vakıftan 103.000 akçe alacağı olduğu Merhûm Ebulfeth Sultan Mehmed Hân-ı Gāzi Evkāfı’na bi’l-fi‘il mütevellî olan Hasan Ağa b. Abdülmennan meclis-i şer‘da vakf-ı mezbûrdan olup mahmiye-i mezbûrede Alacahamamcısı el-Hâc Ali b. Mustafa mahzarında bi’t-tevliye ikrâr [ve] i‘tirâf edip bin yetmiş Zilka‘desi’nin on altıncı gününde vâki‘ harîk-i ekberde muhterik oldukda mezbûr el-Hâc Ali zikrolunan hamam izn-i şer‘le ve benim emrim ile vakf-ı mezbûr mâlından istifâ etmek üzere kendi mâlından yüz beş bin dört yüz elli akçe sarf ve müceddeden binâ ve dokuz bin beş yüz seksen akçe hamam-ı mezbûrun kızdırmasına ve hasırlarına ve kapı keçelerine ve sâir mühimmâtlarına harc u sarf edip cem‘an yüz on beş bin akçenin on iki bin akçesi bin yetmiş iki senesinin Ramazan’ı gurresinde sene-i mezbûre tamamına değin bir senenin ücreti olan yirmi bin akçenin on iki bin akçesine hesâb olunup vakf-ı mezbûrda el-Hâc Ali’nin yüz üç bin akçe alacağı kalıp yedine hat ve hâtemimi hâvî temessük vermişimdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-Zilka‘de sene 1072. Şuhûdü’l-hâl: Mehmed Efendi el-kâtib, Yıldız Hamamcısı Hüseyin Çelebi, Veli Çelebi b. Mustafa, Mehmed Çelebi b. Mustafa, Hüseyin Efendi el-hatîb, Mehmed Efendi el-imâm, Ali Beşe b. Halil, Mustafa Efendi el-attar, el-Hâc Mustafa el-mu‘temed, el-Hâc Ali vekîl-i harç, Mehmed Çelebi Kepeli, Şahin Beşe b. Abdullah