İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 619 Hüküm no: 715 Orijinal metin no: [91a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatih Sultan Mehmed Han Vakfı’na ait olup yanan Hocapaşa Hamamı’nı kendi mallarıyla tamir ettiren hamamcılardan Mehmed Çelebi’nin 23.625 ve Veli Çelebi’nin 40.375 akçe vakıfdan alacaklı oldukları Merhûm ve mağfûrun-leh Ebulfeth Sultan Mehmed Hân-ı Gāzi Evkāfı’na bi’l-fi‘il mütevellî olan umdetü’l-emâsil ve’l-a‘yân makbûlü’s-sudûr ve’l-erkân Hasan Ağa b. Abdülmennan meclis-i şer‘de vakf-ı mezbûrdan olup mahmiye-i mesfûrede Hocapaşa hamamcısı işbu bâ‘iseyi’r-rakīm Mehmed Çelebi ve Veli Çelebi ibney el-Hâc Mustafa mahzarlarında bi’t-tevliye ikrâr ve i‘tirâf edip bin yetmiş senesi Zilka‘desi’nin on altıncı gününde vâki‘ harîk-i ekberde zikrolunan hamam muhterik oldukda mezbûrân Mehmed Çelebi ve Veli Çelebi zikrolunan hamama izn-i şer‘le ve benim emrimle masrûflarını vakf-ı mezbûr mâlından istifâ etmek üzere kendi mâllarından seksen iki bin iki yüz kırk dört akçe sarf ve müceddeden binâ ve on bir bin yedi yüz elli altı akçe hamam-ı mezbûrun kızdırmasına ve hasırlarına ve kapı keçelerine ve sâir mühimmât-ı lâzımesine harc u sarf edip cem‘an doksan dört bin akçenin otuz bin akçesini bin yetmiş iki senesi Ramazan’ı gurresinden sene-i mezbûre tamamına değin bir senenin ücreti olan kırk beş bin akçenin otuz bin akçesine hesâb olunup vakf-ı mezbûrda mezbûr Veli Çelebi’nin kırk bin üç yüz yetmiş beş akçe ve merkūm Mehmed Çelebi’nin yirmi üç bin altı yüz yirmi beş akçe alacakları kalıp yedlerine hat ve hatmi hâvî işbu temessük dahi vermişimdir dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Hüseyin Efendi el-hatîb, Hasan Çelebi el-müezzin, Ebu Ahmedzâde Mehmed Efendi, Mehmed Efendi el-imâm, Hızır Beşe b. ( ), Hasan Çelebi el-muhâmî, el-Hâc Ali el-muhâmî, el-Hâc Mehmed b. Veli el-muhâmî, Ebûbekir Çelebi b. ( ), Kenan b. Abdullah.