İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 621 Hüküm no: 718 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır’da ölen Yahya Beşe’nin küçük çocukları üzerine anneleri Fâtıma bt. Abdullah’ın vasî tayin edildiği Vesâyet. Medîne-i Galata a‘mâlinden kasaba-i Tophâne’de Süheyl Bey mahallesi ahâlîsinden olup diyâr-ı Mısriyye’de müsâfiren fevt olan Yahya Beşe b. Hudâverdi’nin evlâd-ı sıgārı Ahmed ve Mustafa ve kızı Rahime’nin vasîyy-i muhtârı olan Kenan b. Abdullah’ın hiyâneti sikāt-ı Müslimîne cemm-i gafîr ihbârlarıyla sâbit ve zâhir olmağla hâin olup azli lâzım olmağın azl ve yerine müteveffâ-yı mezbûrun zevcesi ve sıgār-ı merkūmûnun vâlideleri olup her vechile vesâyete lâyık olan hâfızetü’l-kitâb Fâtıma bt. Abdullah nâm hatun savb-ı şer‘den sıgār-ı merkūmûnun tesviye-i umûruna vasî nasb ve ta‘yîn olundukda ol dahi vesâyet-i merkūmeyi kabûl ve hizmet-i lâzımesini edâya ta‘ahhüd etmeğin mâ hüve’l-vâki‘ bi’t-taleb ketb olundu. Fî 4 min-Zilka‘deti’ş-şerîfe sene 1072. Şuhûdü’l-hâl: es-Sâbıkūn.