İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 622 Hüküm no: 719 Orijinal metin no: [91b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsper v. İstefan’ın alacak hususunda Mahmud Efendi b. Hızır ve oğlu İbrahim Efendi ile 21.500 akçe üzerine sulh olduğu Sulh, ibrâ. Medîne-i Konya’da İç Kal‘a sâkinlerinden İsper v. İstefan nâm zimmî meclis-i şer‘de sâbıkā medîne-i mezkûrede hâkimü’ş-şer‘ olup kendi tarafından asîl ve necl-i mükerremleri İbrahim Efendi tarafından ikrâr-ı âti’z-zikri tasdîka vekîl olan umdetü’l-mevâlü’l-kirâm Mahmud Efendi b. Hızır mahzarında ikrâr ve takrîr-i kelâm edip mukaddemâ mûmâ-ileyh efendi hazretleri hâkim iken babam mezbûr İstefan nâm zimmî hâlik olup benden kısmet nâmına otuz bin akçe kendi ve beş bin akçe gāib ani’l-meclis oğlu İbrahim Efendi aldı deyü da‘vâ ve kendiler aldıkları otuz bin akçeyi muvâcehesinde şuhûd-ı udûl ile isbât edip oğlu merkūm İbrahim Efendi’nin ahz eylediği beş bin akçeyi isbât sadedinde iken beynimize Müslimûn-ı muslihûn tavassut edip meblağayn-i mezbûreyn da‘vâsından mezbûr Mahmud Efendi bi’l-asâle ve bi’l-vekâle benimle yirmi bir bin beş yüz akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr yirmi bir bin beş yüz akçeyi mûmâ-ileyh Mahmud Efendi yedinden bi’t-tamam ahz u kabz edip meblağayn-i mezbûreyne müte‘allika âmme-i da‘vâdan mûmâ-ileyh Mahmud Efendi’yi ve oğulları İbrahim Efendi’yi ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâdis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mahmud Çavuş b. Nasuh, el-Hâc Mustafa b. el-Hâc Veli, Mehmed Çavuş b. Osman el-mübâşir, Nasrullah b. Abdurrahman, Osman Bey b. Abdullah, Mehmed Ağa b. Mustafa, Hasan Çelebi b. Ali Bey, Mustafa Eendi el-imâm, Ali Bey b. ( ) el-bevvâb, Mehmed b. ( ) el-Arab, Mustafa b. ( ) çukadâr, Mehmed Çelebi el-müezzin ve gayruhum.