İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 625 Hüküm no: 723 Orijinal metin no: [92a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. İstiko’nun emanet olarak verdiği eşyaların yandığına dair Mercimek v. Marko ve oğlu Marko’ya yemin verdirildiği Yemîn. Mahmiye-i İstanbul’da Şehzâde Câmi‘-i Şerîfi kurbünde tavukçu tâifesinden Nikola v. İstiko nâm zimmî mahfil-i kazâda işbu bâ‘isü’s-sifr Mercimek v. Marko ile sulbî kebîr oğlu Marko nâm zimmîler muvâcehelerinde üzerlerine da‘vâ ve takrîr-i kelâm edip bin yetmiş târihinde vâki‘ harîkden mukaddem merkūmânın yedlerinde bi-tarîkı’l-vedî‘a bir mukaffel sandık içinde sekiz bin nakid akçe ve üç makrame ve bir hâtem vaz‘ ve teslîm eylemişdim hâlâ mezbûrândan taleb ederin suâl olunsun dedikde gıbbe’s-suâl mezbûrân cevâblarında fi’l-vâki‘ kable’l-harîk müdde‘î-i mezkûr yedimize bir mukaffel sandık emânet vaz‘ eylemişdi lâkin harîk-i mezkûrda bizim eşyâmız ile ma‘an muhterik oldu içinde olan dahi ma‘lûmumuz değildir dediklerinde merkūmânın yedleri yed-i emânet olup yemînleri ile müsaddak oldukları ecilden müdde‘î-i mezbûrun sandığı içinde sekiz bin akçe ile üç makrame ve bir hâtemini ketm ve ihfâ ve eşyâ-i mezkûreye bir vechile te‘addî ve taksîr etmediklerine merkūmân Mercimek ile oğlu Marko’ya yemîn teklîf olundukda onlar dahi alâ-vefki’l-mesûl her biri yemîn billâhillezî enzele’l-İncîle alâ-İsa aleyhisselâm etmeğin mûcebince müdde‘î-i mezbûr bi-vech mu‘ârazadan men‘ birle mâ-vaka‘a bi’t-taleb ketb olundu. Fî 5 min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Şükrullah b. Mustafa, Keşfî Mustafa Efendi, Veli b. Mahmud, Rasûl b. Rıdvan, Mustafa b. Mehmed, el-Hâc Ahmed b. Mahmud, Mehmed b. Ramazan.