İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 626 Hüküm no: 725 Orijinal metin no: [92a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ali ve küçük kızı Rabia’ya boşandığı kocası Halil Çelebi b. Hasan tarafından günlük beşer akçe nafaka ve elbise bedeli ödemesine hükmolunduğu Nafaka Ramazan-ı şerîfde artmışdır. Mahmiye-i İstanbul’da Müfti Ali Çelebi mahallesinde sâkine bâ‘isetü’l-vesîka Fâtıma bt. Ali nâm hatun meclis-i şer‘de zevc-i mutallıkı Halil Çelebi b. Hasan nâm kimesne mahzarında takrîr-i kelâm ve bast-ı merâm edip mezbûr Halil Çelebi’nin firâşından mütevellîde işbu hacr [ve] terbiyemde olan sulbiye sagīre kızı Râbia’nın nafaka ve kisvesi ve sâir havâic-i lâzımesi için babası mezbûr Halil Çelebi üzerine nafaka farz ve takdîr olunması matlûbumdur dedikde hâkim-i hâsim-i muvakkı‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezbûrenin nafaka ve kisvesi ve sâir havâic-i zarûriyesi için külle yevm beşer akçe nafaka farz ve takdîr edip vakt-i zarûretde istidâneye ve lede’z-zafer mezbûr Halil Çelebi’ye rücû‘a mezbûr Fâtıma’ya izin birle mâ hüve’l-vâki‘ bi’t-taleb ketb olundu. Fi’l-yevmi’s-sâmin min-şehri Ramazani’l-mübârek li-sene isneteyn ve seb‘în ve elf. Şuhûdü’l-hâl: Musa Efendi b. Ahmed, el-Hâc Ahmed b. Mahmud kethudâ-yı muhzırân, Şâkir Çelebi b. Mustafa, Abdi Çelebi b. Hüseyin.