İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 626 Hüküm no: 726 Orijinal metin no: [92b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Talatî Hüseyin Efendi’nin İzmit’teki bir göz değirmenini Ahmed Efendi b. Kemaleddin’e sattığı Bey‘-ı değirmen. Husûs-ı âti’l-beyânın mahâllinde tahrîri iltimâs olunmağın savb-ı şer‘-i mutahhardan Mevlânâ Mahmud Efendi b. İbrahim Çelebi irsâl olunup ol dahi mahmiye-i İstanbul’da Cebecibaşı mahallesinde sâkin olup sâbıkā Antakya kādısı olan mefharu kuzâtü’l-İslâm zübdetü vülâti’l-enâm Ahmed Efendi b. Kemâleddin’in menziline varıp zeyl-i vesîkada isimleri mastûr olan Müslimîn huzûrunda akd-i meclis-i şer‘-i şerîf etdikde mahrûse-i Galata’ya tâbi‘ Tophâne nâm kasaba sâkinlerinden umdetü kuzâtü’l-İslâm Talatî Hüseyin Efendi meclis-i ma‘kūd-ı mezbûrda mûmâ-ileyh Ahmed Efendi mahzarında ikrâr ve takrîr-i kelâm edip Vilâyet-i Anadolu’da İznikmid kazâsına tâbi‘ Söğüdlü nâm karye sınırı dâhilinde vâki‘ bir tarafı Koyunoğlu mülkü ve bir tarafdan Çorbacı tarlası ve bir tarafdan Hüseyin Ağa tarlası ve bir tarafdan tarîk-i âm ile mahdûd mülk-i müşterâm olan bir göz değirmenimi sekiz bin nakd-i râyic fi’l-vakt fıddî akçeye tarafeynden îcâb ve kabûlü hâvî safka-i vâhide ile mûmâ-ileyh Ahmed Efendi’ye bey‘-ı bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra semen olan meblağ-ı mezbûr sekiz bin akçeyi mûmâ-ileyh Ahmed Efendi yedinden tamamen ahz u kabz edip zikri mürûr eden değirmeni mahâllinde zabt u tasarrufa mûmâ-ileyh Ahmed Efendi’yi taslît eyledim ba‘de’l-yevm mârrü’z-zikr değirmen mûmâ-ileyh Ahmed Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîk vâki‘ hâli mevlânâ-yı mezbûr mahâllinde tahrîr ba‘dehû meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-kuzât Ahmed Efendi el-kādî, Yusuf Efendi b. Hamza Çelebi, Osman Efendi el-kādî, Ahmed Efendi b. Osman, el-Hâc Kasım Efendi b. Hüseyin.