İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 627 Hüküm no: 727 Orijinal metin no: [92b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Sefer’e aldığı borçları ödediğini ispat etmesi için süre verildiği İstimhâl. Mahmiye-i İstanbul’da ( ) mahallesinden olup bundan akdem garîkan fevt olan Yusuf Ağa b. Abdülmennan’ın vasîyy-i muhtârı Ahmed Ağa b. Mehmed meclis-i şer‘de işbu kitâbın sahibi umdetü’l-a‘yân Mehmed Ağa b. Sefer mahzarında üzerine da‘vâ ve takrîr-i kelâm edip mezbûr Mehmed Ağa bin yetmiş senesi Cemâziyelâhiresi gurresinden Serdar el-Hâc Davud nâm kimesneden iki bin riyâlî guruş ve Feridun Ağa hatunu Sâliha Hatun’dan sene-i mezbûre Recebi’l-ferd’inin üçüncü gününde dört bin üç yüz on kıt‘a esedî guruş ve Matbah Emini Mustafa Ağa’dan dokuz yüz esedî guruş ki cem‘an beş bin iki yüz on esedî guruş ile iki bin riyâlî guruş istikrâz ve kabz edip ba‘dehû mezbûr Yusuf Ağa hayatında mezbûr Mehmed Ağa’nın emriyle meblağ-ı mezbûrun mecmû‘una kefâlet-i sahîha-i şer‘iye ile kefîl oldukdan sonra meblağ-ı mezbûr beş bin iki yüz on esedî guruş ile iki bin riyâlî guruşu merkūm Mehmed Ağa’dan vesâyeten taleb ederim suâl olunsun dedikde gıbbe’s-suâl mezbûr Mehmed Ağa ber-vech-i muharrer mezbûrûndan beş bin iki yüz on esedî guruş ile iki bin riyâlî guruş istikrâz ve kabz edip mezbûr Yusuf Ağa hayatında meblağ-ı mezbûrun mecmû‘una emriyle kefâlet-i sahîha-i şer‘iye ile kefîl olup ve meblağ-ı mezbûru kefâleten dâyinlerime teslîm etmiş idi lâkin yetmiş bir senesi Cemâziyelâhire’sinde mezbûr Yusuf Ağa’nın mahrûse-i Üsküdar’a tâbi‘ Kuzguncuk nâm karyede vâki‘ bahçesinde bir defa beş bin riyâlî guruş ve bir defa mahmiye-i Edirne’de bin yetmiş senesi Şa‘bâni’l-mu‘azzam’ının evâhirinde bin sekiz yüz doksan esedî guruş ve bin yetmiş bir senesi Saferü’l-hayrı gurresinde birâderim ve vekîlim Ahmed Ağa yediyle bin yedi yüz on üç esedî guruş cem‘an beş bin riyâlî guruş ile üç bin altı yüz otuz esedî guruş teslîm eyledim deyü def‘le mukābele edecek gıbbe’l-istintâk ve’l-inkâr mezbûr Mehmed Ağa’dan def‘-i mezbûrunu mübeyyine beyyine taleb olundukda udûl-i Müslimînden olup Ayasofya kurbünde sâkin Yusuf Çavuş b. Rıdvan ve Zülfikar Efendi b. Ahmed ve Mehmed b. Oruc nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezbûr Yusuf Ağa’ya hayatında zikrolunan Kuzguncuk nâm karyede vâki‘ bahçesinde mezbûr Mehmed Ağa’nın birâderi ve vekîli Ahmed Ağa mezbûr Mehmed Ağa’nın mâlı olmak üzere deyni için vekâleten bizim huzûrumuzda beş bin riyâlî guruş def‘ ü teslîm ol dahi ahz u kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra meblağ-ı mezbûr bin sekiz yüz doksan esedî guruş teslîmine şâhid-i asl olup mahmiye-i Edirne’de sâkin Süleyman Efendi b. ( ) lisânından şâhid-i fer‘ olan Ahmed Bey b. Ömer ve İbrahim b. Osman nâm kimesneler ile yine husûs-ı mezbûra şâhid-i asl olup Karahisar kasabasında sâkin Ahmed Ağa b. Mustafa lisânından şâhid-i fer‘ olan Ahmed Bey b. İbrahim ve el-Hâc İsa b. Cafer nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezbûr Mehmed Ağa mahmiye-i Edirne’de bin yetmiş senesi Şa‘bâni’l-mu‘azzam’ının evâhirinde meblağ-ı mezbûr bin sekiz yüz doksan esedî guruşu mezbûr Yusuf Ağa’ya hayatında bizim huzûrumuzda def‘ ü teslîm ol dahi ahz u kabz eyledi biz bu husûsa şâhidleriz şehâdet dahi ederiz siz dahi bizim lisânımızdan şâhidler olup şehâdet dahi edin deyü şehâdetlerini mezbûrân Süleyman Efendi ve Ahmed Ağa bize tahmîl biz dahi tahammül ve kabûl eyledik vech-i muharrer üzere mezbûrân lisânından şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra meblağ-ı mezbûr bin yedi yüz on üç esedî guruş def‘ ve teslîmine mezbûr Mehmed Ağa istimhâl etmeğin mehl-i şer‘î ile imhâl olunup mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mustafa Efendi b. Derviş, Hasan Ağa b. ( ), Mehmed Ağa b. ( ). Hasan Ağa b. Cafer, Ramazan Çavuş b. ( ), Ali Beşe b. Habib, Mehmed b. Hüseyin.