İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 629 Hüküm no: 729 Orijinal metin no: [93a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mehmed b. Ahmed’in aldığı borç karşılığında rehin verdiği eşyasının satışına varisleri tarafından izin verildiği Mahmiye-i İstanbul’da Sofular mahallesinde sâkin iken bunan akdem fevt olan Mehmed b. Ahmed nâm kimesnenin verâseti zevce-i metrûkesi Âişe bt. Ali’ye ve sulbî kebîr oğulları Seyyid Mustafa ve Seyyid Ahmed ve sagīre kızı Fâtıma’ya münhasıra olduğu şer‘an zâhir ve müte‘ayyin oldukdan sonra mezbûr Seyyid Mustafa kendi tarafından asâleten ve mezbûrân Ahmed ve Âişe taraflarından husûs-ı âti’z-zikre vekîl olup Mehmed Beşe b. Mahmud ve İbrahim Beşe b. Ahmed şehâdetleri ile şer‘an vekâleti sâbite oldukdan sonra vekâleten ve sagīre-i mezkûrenin kıbel-i şer‘den mansûb vasîsi olan Sinan Beşe b. Hüseyin vesâyeten meclis-i şer‘de Dergâh-ı âlî yeniçerilerinin altmış sekizinci cemâ‘atine mahsûs odanın mühimmât-ı lâzımesi için mevkūfe nükūdun hâlâ mütevellîsi mefharu’l-a‘yân Osman Çelebi b. Mehmed mahzarında her biri asâleten ve vekâleten ve vesâyeten ikrâr ve i‘tirâf edip müteveffâ-yı mezbûr hâl-i hayatında mezbûr Osman Çelebi’den mal-ı vakf olmak üzere bin kıt‘a riyâlî guruş iktirâz ve kabz edip meblağ-ı mezbûr mukābelesinde eşyâ-i memlûkesinden bir sîm mücevher raht ve bir mücevher şam‘dân rehin def‘ ü teslîm mezbûr Osman Çelebi dahi kabz ve tesellüm edip kable’l-ahz fevt olmağla zikrolunan raht ve şam‘dânı iznimiz ile mezbûr Osman Çelebi ba‘de’l-müzâyede zikrolunan rahtı kırk iki bin dört yüz akçeye ve şam‘dânı yedi bin beş yüz akçeye cem‘an kırk dokuz bin dokuz akçeye bey‘ edip meblağ-ı mezbûr bin riyâlî guruşun iki yüz elli guruş asl-ı mâl ile güzeşte [ve] murâbahadan lâzım gelen yüz yetmiş beş guruş mukābelesinde mezbûr Osman Çelebi meblağ-ı mezbûr kırk dokuz bin dokuz yüz akçeyi kabz edip asl-ı mâl olan meblağ-ı mezbûr bin riyâlî guruşdan yedi yüz elli kıt‘a riyâlî guruş bâkī kalmışdır dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâdî ve’l-işrîn min-Şevvali’l-mükerrem li-sene isneteyn ve seb‘în ve elf. Şuhûdü’l-hâl: Hüseyin Ağa b. Abdullah, Mehmed Çelebi b. Mahmud, Hasan Beşe çukadâr, Mustafa Çelebi b. ( ).