İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 630 Hüküm no: 730 Orijinal metin no: [93a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki aşçı ve kebapçı taifesi ile bozacı taifesinin birbirlerinin işlerine karışmamalarına dair karşılıklı söz verdikleri Hüccet-i kebab ve bozacıyân. Mahmiye-i İstanbul’da vâki‘ aşcı ve kebabcı tâifesinin kethudâları Mustafa Beşe b. Hasan ve yiğitbaşıları Hüseyin Beşe b. Mustafa ve ihtiyârlarından Mustafa Bey b. Mehmed ve Üstâd Mehmed b. Abdi ve el-Hâc Mehmed b. Müstecâb ve Ahmed Beşe b. Mehmed nâm kimesneler meclis-i şer‘de mahmiye-i mezbûrede vâki‘ bozacı tâifesinin kethudâları Mustafa Beşe b. Abdi ve yiğitbaşıları Mehmed Beşe b. Abdullah ve ihtiyârlarından Ahmed Beşe b. İbrahim ve Ali Beşe b. Yusuf ve Mehmed Beşe b. Aydın ve Koka v. Dolo ve Kuzma v. Dirko ve Dimo v. Marki ve sâirleri mahzarında her biri takrîr-i kelâm edip kadîmü’l-eyyâmdan beri köfte ve et kebablarının tabh ve bey‘i bize ve ciğer kebabının tabh ve bey‘i onlara mahsûs iken anlar bize mahsûs olan köfte ve et kebabı tabh ve bey‘ ve biz mezbûrûna mahsûs ciğer kebabı tabh ve bey‘ etmemiz ile beynimizde kīl ü kāl ve bâ‘is-i ihtilâl olmağın ba‘de’l-yevm mezbûrûn bozacılar tâifesi kadîmden bize mahsûs olup tabh ve bey‘ eylediğimiz köfte ve et kebabı tabh ve bey‘ etmeyip ancak kadîmden kendilere mahsûs ciğer kebabı ile müşterilerinin taşrada tabh için getirdikleri köfte ve et kebabından gayrı tabh ve bey‘ etmeyip ve biz dahi onlara mahsûs ciğer kebabı tabh ve bey‘ etmemek üzere mezbûrûn bozacı tâifesiyle kavl ü ittifâk ve ahd [ü] mîsâk eyledik mezbûrûndan suâl olunup bu vech üzere olan ittifâkımız tahrîr ve hüccet olunması murâdımızdır dediklerinde gıbbe’s-suâl mezbûrûn bozacı tâifesi fi’l-vâki‘ kazıyye mezbûrûn aşcı ve kebabcı tâifesinin takrîrleri üzere olmuşdur deyü ber-vech-i muharrer olan kavl ü ittifâkı her biri ikrâr ve tasdîk eylediklerine talebleri ile vâki‘u’l-hâl hıfzen li’l-makāl ketb olunup yedlerine def‘ olundu. Fi’l-yevmi’s-sâdis min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Ahmed b. Mahmud, Mehmed Çavuş b. ( ), Ali Beşe b. Mustafa, Ali Çelebi b. Haydar, Kasab Mustafa el-muhzır, Rasûl b. Rıdvan, Abdi Çelebi b. Hüseyin, Veli b. Mahmud.