İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 631 Hüküm no: 732 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Hasan’ın ölen kocası Rüstem Beşe b. Ali ile altı bin akçe mehir üzerine evlendiğini ispat ettiği Altı bin akçe mehr-i mü’eccel üzerine nefsini tezvîci isbât. Mahmiye-i İstanbul’da Hasan Paşa mahallesinde sâkin iken bundan akdem vefât eden Rüstem Beşe b. Ali’nin verâseti zevce-i metrûkesi Meryem bt. Hasan’a ve li-ebeveyn karındaşı Hasan’a ve li-ebeveyn kız karındaşları Râbia ve Melekî’ye münhasıra olduğu şer‘an mütehakkık oldukdan sonra mezbûre Meryem meclis-i şer‘-i hatîrde tereke-i müteveffâ-yı mezbûre vâzı‘u’l-yed olan karındaşı el-Hâc Hasan mahzarında üzerine da‘vâ ve takrîr-i kelâm edip mezbûr Hasan zevcim müteveffâ-yı mezbûrun cemî‘ terekesine vâzı‘u’l-yed olup altı bin akçe mehr-i mü’eccelimi taleb eylediğimde vermede ta‘allül eder suâl olunup alıverilmesi matlûbumdur dedikde gıbbe’s-suâl mezbûr Hasan cevâbında bin akçe mehrini ikrâr ve mâ‘adâyı inkâr edicek müdde‘iye-i mezbûreden müdde‘âsını mübeyyine beyyine taleb olundukda udûl-i Müslimînden olup mahalle-i mezbûrede sâkin İbrahim Efendi b. Mustafa el-imâm ve Mustafa b. Receb nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘iye-i mezbûre müteveffâ-yı merkūm Rüstem’e bin elli dokuz senesinde altı bin akçe mehr-i mü’eccel üzerine nefsini tezvîc edip ol dahi bizim huzûrumuzda tezevvüc ve kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın ba‘de’t-tahlîfi’ş-şer‘î mûcebince meblağ-ı mezbûru müdde‘iye-i mezbûreye edâya merkūm el-Hâc Hasan’a tenbîh birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Mehmed Çavuş b. Yusuf el-mübâşir, Hüseyin Çelebi b. Mustafa, Yusuf Bey b. Abdullah, Ahmed b. Ali, Mustafa el-muhzır.