İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 632 Hüküm no: 733 Orijinal metin no: [93b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Şemseddin’in muhâlaa yoluyla kocası Mehmed Beşe b. Hüseyin’den boşandığını ispat ettiği İsbât-ı hul‘. Mahmiye-i İstanbul’da Keçeci Pîrî mahallesinde sâkine Âişe bt. Şemseddin mahfil-i kazâda Mehmed Beşe b. Hüseyin mahzarında üzerine da‘vâ ve takrîr-i kelâm edip mezbûr Mehmed mukaddemâ zevcim olup târih-i kitâbdan bir hafta mukaddem zimmetinde mütekarrir ve ma‘kūdün-aleyh olan iki bin akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere merkūm Mehmed benimle muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra ke’l-evvel benimle zevciyet mu‘âmelesi etmek murâd eder suâl olunup kasr-ı yedine tenbîh olunmak matlûbumdur dedikde gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda udûl-i Müslimînden olup mahalle-i mezbûrede sâkin Mehmed b. İsmail el-müezzin ve Mehmed b. Yusuf nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘iye-i mezbûre Âişe Hatun iki bin akçe mehr-i mü’ecceli ve nafaka-i iddet-i ma‘lûmesi ve me’ûnet-i süknâsı kendi üzerine olmak üzere huzûrumuzda zevci mezbûr Mehmed ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın müdde‘iye-i mezbûre Âişe Hatun’a kasr-ı yedine mezbûr Mehmed’e tenbîh olunup mâ-vaka‘a bi’t-taleb ketb olundu. Fi’s-sâmin min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed b. Musa, Mustafa Çelebi b. Ali, Şükrullah b. Mustafa, Rasûl b. Rıdvan.