İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 637 Hüküm no: 741 Orijinal metin no: [94b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kezban bt. Hüseyin ile oğlu İsmail b. İbrahim’in ölen İsmail ve Sâliha’nın vasîleri zimmetinde kalan akçeden miras hisselerinin verilmesine hükmolunduğu Mahrûse-i Üsküdar’da Yenimahalle’de sâkin iken bundan akdem vefât eden İbrahim nâm kimesnenin verâseti zevce-i metrûkesi Kezban bt. Hüseyin ile sulbî sagīr oğlu İsmail ve sulbiye sagīre kızı Sâliha’ya münhasıra olap ba‘de’l-kısme mezbûre Sâliha dahi vefât edip verâseti vâlidesi mezbûre Kezban’a ve li-üm karındaşı Mahmud nâm sagīra ve li-ebeveyn karındaşı İsmail’e münhasıra olup kable’l-kısme mezbûr İsmail dahi vefât edip verâseti vâlidesi mezbûre Kezban’a ve li-üm karındaşı mezbûr Mahmud’a ve Ömer Hamza b. Derviş’e münhasıra olup kable’l-kısme mezbûr Mahmud dahi vefât edip verâseti babası İsmail b. Davud nâm kimesne ile vâlidesi mezbûre Kezban’a münhasıra olduğu ve tashîh-i mes’eleleri bi-tarîkı’l-münâsahati’l-mezkûre elli dört sehimden olup sihâm-ı mezbûreden yirmi altı sehm mezbûre Kezban’a ve on sehm müteveffâ-yı mezbûr Mahmud’un babası mezbûr İsmail ve on sekiz sehmi mezbûr Hamza’ya intikāl ve isâbet eylediği şer‘an zâhir ve mütehakkık oldukdan sonra mezbûrân İsmail ve Kezban meclis-i şer‘-i hatîrde müteveffiyân-ı mezbûrân İsmail ve Sâliha’nın vasîyy-i şer‘îleri olmağla babalarından intikāl eden emvâllerine vâzı‘u’l-yed olan mezbûr Hamza mahzarında sagīrân-ı mezbûrân İsmail ve Sâliha’ya babaları müteveffâ-yı evvel İbrahim’den intikāl edip ilâ-vefâtihimâ harc u sarfından sonra vasîyy-i mezbûr yedinde bâkī kalan altı bin beş yüz doksan yedi akçeden hisse-i şer‘iyemizi taleb ederiz suâl olunsun dedikde gıbbe’s-suâl vasîyy-i mezbûr cevâbında müdde‘iyân-ı mezbûrânın takrîrleri üzere yedinde müteveffiyân-ı mezbûrânın mâllarından altı bin beş yüz doksan yedi akçe olduğunu bi-tav‘ihiikrâr eylemeğin alâ-mûceb-i ikrârihî meblağ-ı mezbûrdan müdde‘iyân-ı mezbûrânın hisselerini edâ ve teslîme vasîyy-i mezbûr Hamza’ya tenbîh birle mâ-vaka‘a bi’t-taleb ketb olundu. Fi’l-yevmi’s-sânî min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Abdi b. Hüseyin, Veli b. Mahmud, Mustafa b. İsa, Şükrullah b. Mustafa.