İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 637 Hüküm no: 740 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki bozacı ile aşçı ve kebapçı taifelerinin birbirlerinin işlerine karışmamaları hususunda söz verdikleri Hüccet-i bozacıyân ma‘a kebabcıyân. Mahmiye-i İstanbul’da vâki‘ bozacı tâifesinin kethudâları Mustafa Beşe b. Abdi ve yiğitbaşıları Mehmed Beşe b. Abdullah ve ihtiyârlarından Ahmed Beşe b. İbrahim ve Ali Beşe b. Yusuf ve Mehmed Beşe b. Aydın ve Koka v. Dolo ve Kozma v. Dirko ve Dimo v. Marki ve sâirleri meclis-i şer‘de mahmiye-i mezbûrede vâki‘ aşcı ve kebabcı tâifesinin kethudâları Mustafa Beşe b. Hasan ve yiğitbaşıları Hüseyin Beşe b. Mustafa ve ihtiyârlarından Mustafa Bey b. Mehmed ve Üstâd Mehmed b. Abdi ve el-Hâc Mehmed b. Müstecâb ve Ahmed Beşe [b.] Mehmed ve sâirleri mahzarında her biri takrîr-i kelâm edip kadîmü’l-eyyâmdan beri ciğer kebabının tabh ve bey‘i bize ve köfte ve et kebabının tabh ve bey‘i mezbûrûna mahsûs olup biz mezbûrûna mahsûs olan köfte ve et kebabı ve onlar dahi bize mahsûs olan ciğer kebabı tabh ve bey‘ etmeleri ile beynimizde kīl [ü] kāl ve bâ‘is-i ihtilâl olmağın ba‘de’l-yevm mezbûrûn aşcı ve kebabcılar kadîmden bize mahsûs olan ciğer kebabı tabh ve bey‘ etmeyip ve biz dahi kadîmden bize mahsûs ciğer kebabı ile müşterilerimiz taşrada tabh için getirdikleri köfte ve et kebabından gayrı bey‘ için köfte ve kebab tabh etmemek üzere mezbûrûn aşcı ve kebabcılar ile kavl ü ittifâk ve ahd ü mîsâk eyledik mezbûrûndan suâl olunup ber-minvâl-i muharrer olan ittifâkımız tahrîr ve hüccet olunması murâdımızdır dediklerinde gıbbe’s-suâl mezbûrûn aşcı ve kebabcı tâifesi fi’l-vâki‘ kazıyye mezbûrûn bozacı tâifesinin takrîrleri üzere olmuşdur deyü vech-i muharrer üzere olan kavl ü ittifâkı her biri tasdîk eylediklerine vâki‘u’l-hâl hıfzen li’l-makāl ketb olunup yedlerine def‘ olundu. Fi’l-yevmi’s-sâdi min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: el-Hâc Ahmed b. Mehmed, Mahmud Çavuş, Ali Beşe b. Mustafa, Ali Çelebi b. Haydar, Abdi b. Hüseyin, Baba Rasûl [b.] Rıdvan, Veli b. Mahmud, Mahmud b. Veli, Kasab Mustafa.