İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 640 Hüküm no: 746 Orijinal metin no: [95a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Veli Paşa’nın çocukları Mehmed Bey ve Fâtıma Hanım’ın miras hususunda anneleri Fâtıma bt. Abdullah’ın zimmetini ibra ettikleri Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Mustafa Efendi b. Ahmed irsâl olunup ol dahi Dârü’l-hilâfeti’l-aliyye Kostantıniyyeti’l-mahmiye’de Hoşkadem mahallesinde sâkin fahrü’l-emâcid ve’l-e‘âlî câmi‘ü’l-mehâmid ve’l-meâli İsmail Ağa b. Ali’nin menziline varıp zeyl-i rakīmde esâmîleri mastûr Müslimîn huzûrunda akd-i meclis-i şer‘-i kavîm eyledikde mahmiye-i mezbûrede Cezerî Kasım Paşa mahallesi sükkânından olup Akkirman’da vefât eden merhûm Veli Paşa’nın verâseti zevce-i metrûkeleri Fâtıma Hanım bt. Abdullah ve Âtike Hatun’a ve sulbî sagīr oğlu Mehmed Bey ile sulbiye sagīre kızı Fâtıma Hanım’a münhasıra olduğu şer‘an zâhir oldukdan sonra sagīrân-ı mezbûrânın kıbel-i şer‘den tesviye-i umûrlarına vasîleri ve ammileri mûmâ-ileyh İsmail Ağa meclis-i ma‘kūd-ı mezbûrda merkūme Fâtıma Hanım tarafından ikrâr-ı âti’z-zikri tasdîka vekîl olup zât-ı mezbûreyi ma‘rifet-i şer‘iye ile ârifân olan Halil Bey b. Ahmed ve Ebûbekir b. Ali şehâdetleri ile şer‘an vekâleti sâbite fahrü’l-akrân Ömer Ağa b. Mehmed el-muhâmî mahzarında bi’l-vesâye ikrâr ve takrîr-i kelâm edip müteveffâ-yı mezbûrun terekesinden bir al çukaya kaplı bir sırt semmûrun ve yeşil çukaya kaplı bi sırt semmûrun ve dört sîm kılıcı müvekkile-i mezbûre yedinden vesâyet-i mahkiyem hasebiyle alıp kabz edip min-ba‘d müteveffâ-yı mezbûrun terekesinden müvekkile-i mezbûre Fâtıma Hanım yedinde kalîl ve kesîr ve celîl ve hakīr ism-i mâl ıtlâk olunur bir şey kalmadı dedikde vasîyy-i mezbûru kelimât-ı muharreresinde vekîl-i mezbûr bi’l-muvâcehe tasdîk ve bi’l-müşâfehe tahkīk eylediğini mevlânâ-yı mezbûr mahâllinde tahrîr ba‘dehû ma‘an ba‘s olunan Mehmed b. Ramazan ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’s-sâbi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ekmelü’l-müderrisîn Mehmed Efendi, Fahrü’l-müderrisîn Cafer Efendi, Ahmed Efendi b. Bali, Hoca Mehmed Efendi, İsmail Bey b. İbrahim, Mehmed Efendi b. Abdülkerim, Mehmed Efendi el-imâm, Ömer Ağa b. Receb.