İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 641 Hüküm no: 747 Orijinal metin no: [95a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Abdullah’ın ölen Ali b. Mustafa’da olan alacağıyla ilgili olarak kardeşi Ahmed ile beş bin akçe üzerine sulh oldukları Mahmiye-i İstanbul’da Horhor kurbünde Kızılminâre mahallesi sâkinlerinden İbrahim Beşe b. Abdullah nâm kimesne meclis-i şer‘-i hatîr-i lâzımü’t-tevkīrde bundan akdem vefât eden Ali Beşe b. Mustafa’nın li-ebeveyn karındaşı ve hasran vârisi olmağla metrûkâtına vâzı‘u’l-yed olan râfi‘u’l-kitâb Ahmed nâm kimesne mahzarında ikrâr ve takrîr-i kelâm edip müteveffâ-yı mezbûr zimmetinde yüz on beş guruş hakkım olup kable’l-edâ vefât edip terekesine mezbûr Ahmed vaz‘-ı yed etmeğin bundan akdem meblağ-ı mezbûru mezbûr Ahmed’den da‘vâ ve taleb eylediğimde inkâr edip ben dahi müdde‘âmı şuhûd-ı udûl ile isbât sadedinde olmamla beynimizde münâza‘ât-ı kesîre ve muhâsamât-ı şedîde ve ekîde cereyânından sonra beynimize muslihûn vesâteti ile da‘vâ-yı meşrûhumdan mezbûr Ahmed benimle beş bin akçe üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûru bi’t-tamam mezbûr Ahmed yedinden alıp kabz eyledim ba‘de’l-yevm mâ‘adâya müte‘allika da‘vâdan zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Ağa b. Mustafa, Ahmed Beşe b. Abdullah, Osman b. Süleyman, Mehmed b. Ahmed, Abdülkerim b. Halil ve gayruhum.