İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 645 Hüküm no: 751 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nuh Bey b. Hüseyin Paşa’nın Efrenc asıllı cariyesi Çâker’i azat ettiği Itknâme. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi b. Mehmed irsâl olunup ol dahi Dârü’l-hilâfeti’l-aliyye Kostantıniyyeti’l-mahmiye’de Cebecibaşı mahallesinde vâki‘ kapıcıbaşılarından umdetü’l-emâcid ve’l-ekârim câmi‘ü’l-mehâmid ve’l-mekârim zü’l-kadri’r-refî‘ ve’l-câhi’l-menî‘ Nuh Bey b. el-merhûm Hüseyin Paşa’nın sâkin olduğu menzil-i âlîlerine varıp akd-i meclis-i şer‘-i şerîf eyledikde mûmâ-ileyh Nuh Bey meclis-i mezbûrda ikrâr ve i‘tirâf edip bana rıkkını mu‘terife olan çatık kaşlı elâ gözlü uzun boylu Efrenciyyetü’l-asl bâ‘isetü’r-rakīm Çâker bt. Abdullah nâm câriye-i memlûkesi hasbeten lillâhi te‘âlâ tahrîr ve i‘tâk ve silk-i harâ’ir-i asliyâta ilhâk eyledim ba‘de’l-yevm mezbûre Çâker sâir harâ’ir-i asliyât gibi hürre olup üzerinde velâdan gayrı hakkım kalmadı dedikde vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Hasan b. Bayram ile meclis-i şer‘a gelip alâ-vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Efdalü efâdılı’l-müderrisîni’l-kirâm ekmelü ekâmili’l-muhakkıkīni’l-fihâm Mehmed Efendi b. eş-Şeyh Muharrem, Mefharu’l-a‘yân İrfan Ağa b. ( ) kethudâ-yı müşârün-ileyh, Musa Bey b. Mehmed, eş-Şeyh Ebûbekir eş-Şâmî el-müderris, Mehmed b. Ali, Receb b. Abdullah.