İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 644 Hüküm no: 750 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Sinan Beşe b. Mustafa’nın İbrahim Ağa b. Mehmed zimmetinde olan alacağının varisi Bostancı Ali Bey tarafından tahsil edildiği İkrâr-ı kabz-ı meblağ. Vilâyet-i Rumeli’nde Boğazhisâr’da harîk olan kalyonda bundan akdem fevt olan Sinan Beşe b. Mustafa’nın karındaşı oğlu Bostancı Ali Bey mahfil-i kazâda işbu râfi‘u’l-kitâb zahru’l-a‘yân İbrahim Ağa b. Mehmed mahzarında ikrâr ve takrîr-i kelâm edip mûrisim müteveffâ-yı mezbûr Sinan Beşe’nin karındaşı oğlu olduğumu isbât etdiğimden sonra müteveffâ-yı mezbûr mâlından mezbûr İbrahim Ağa yedinde emânet olan yirmi iki buçuk esedî ve altı zolota sekiz riyâlî guruş ve üç bin üç yüz elli hurda akçeyi mezbûr İbrahim Ağa yedinden verâsetim hasebiyle bi’t-tamam ahz u kabz eyledim meblağ-ı mezbûrdan yedimde bir akçe ve bir habbe kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Solak Mehmed Ağa b. Hüseyin, karındaşı Hasan Çelebi b. Hüseyin, Hamza Bey b. ( ), Mehmed Çelebi b. Ramazan, Şükrullah b. Mustafa.