İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 646 Hüküm no: 756 Orijinal metin no: [96a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Hüseyin’in kendisini boşayan kocası Muslı Çelebi b. Mehmed’in zimmetini ibra ettiği İbrâ. Mahmiye-i İstanbul’da Üsküblü mahallesinde sâkine Sâliha bt. Hüseyin nâm hatun meclis-i şer‘de zevc-i mutallıkı işbu râfi‘u’l-kitâb Muslı Çelebi b. Mehmed nâm kimesne mahzarında bi-tav‘ihâ ikrâr ve takrîr-i kelâm edip mezbûr Muslı Çelebi bundan akdem zevcim olup beni talâk-ı bâyin ile tatlîk eylediğinde zimmetinde mütekarrir ve ma‘kūdün-aleyh olan dört bin akçe mehr-i mü’eccelim mukābelesinde mahalle-i mezbûrede vâki‘ olan Kethudâ Hatun Evkāfı olan odalardan bir tarafı Yusuf nâm kimesne menzili ve bir tarafı tarîk-i âm ile mahdûd yevmî bir akçe icâre-i mü’eccele ile tasarrufunda olan menzilin hakk-ı tasarrufunu izn-i mütevellî-i mezbûr ile bana ferâğ ve tefvîz ben dahi tefevvüz ve kabûl edip zevciyete müte‘allika olan âmme-i da‘vâdan mezbûr Muslı Çelebi’nin zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Ahmed Çelebi b. Hasan, Şükrullah b. Mustafa, Abdi b. Hüseyin, Mustafa b. Ahmed.