İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 647 Hüküm no: 757 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmudpaşa çarşısındaki çerçi taifesi ile Galata’daki şişeci taifesinin birbirlerinin işlerine karışmamak hususunda söz verdikleri Hüccet-i hurde-fürûş. Mahmiye-i İstanbul’da Mahmudpaşa sûkunda vâki‘ hurde-fürûş tâifesinin kethudâları Mosi v. Abraham ve yiğitbaşıları Avram v. David ve ihtiyârlarından Menahim v. Yako ve Salom v. Avraham ve Pantof v. Yasef ve Manasi v. Baruh ve Haim v. Avraham ve sâirleri meclis-i şer‘de mahrûse-i Galata’da şişeci tâifesinin kethudâları Yorgi v. Mihal, Yani v. İstemad ve sâirleri muvâcehelerinde üzerlerine takrîr-i da‘vâ edip mezbûrlar ancak şişeci olup kendilere mahsûs metâ‘larından gayrıya tecâvüzleri yoğiken hâlâ dârü’l-harbden sefineler ile gelip bizim hirfetimiz erbâbına mahsûs olan metâ‘ımızdan gözlük ve dûrbîn ve süpürge ve devât ve sepet ve âyine ve sâir hırdavatı dahi mezbûrûn şişeciler almak ile bizim kâr ü kisbimize müzâyaka ve ârız olmuş suâl olunup her hirfet kadîmden olıgeldiği üzere kendi metâ‘ların alıp âharın metâ‘ına te‘addî ve tecâvüz etmemek üzere tenbîh olunmak murâdımızdır dediklerinde gıbbe’s-suâl şişeci tâifesi cevâblarında zikrolunan hırdavatı aldıkların ikrâr edip lâkin ol hırdavat müdde‘iyyûn-ı mezbûrûn hurde-fürûş Yahûd tâifesinin kendilere mahsûs metâ‘ları olduğunu inkâr eylediklerinde mahmiye-i mezbûrede Uzun Çarşı’da vâki‘ hurde-fürûş Müslimîn tâifesinden olup husûs-ı mezbûra küllî vukūfu olan Mehmed Çelebi b. Receb ve Ahmed Çelebi b. Mehmed ve el-Hâc Davud b. Mehmed ve Abdülkadir b. Mehmed ve Osman b. Mehmed ve Osman Bey b. Piyale ve Mehmed Ağa b. İbrahim ve Ömer Bey b. Piyale nâm kimesnelerden husûs-ı kazıyye suâl ve istihbâr olundukda onlar dahi kadîmü’l-eyyâmdan beri dârü’l-harbden sefineler ile gelen hırdavatdan gözlük ve dûrbîn ve süpürge ve devât ve sepet ve âyine Mahmudpaşa sûkunda vâki‘ hurde-fürûş Yahûdî tâifesinin mahsûs metâ‘larıdır deyü her biri alâ-tarîkı’ş-şehâde ihbâr eylediklerinde ba‘de’l-yevm şişeci tâifesi kendiler mahsûs metâ‘dır fazla[dan] mezbûrûn hurde-fürûş Yahûdî tâifesinin metâ‘ları olan hırdavata müdâhale etmemek üzere tenbîh olunup mâ-vaka‘a bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: Fahrü’l-akrân Mahmud ser-muhzırân, Mehmed Ağa b. ( ), el-Hâc Ahmed b. Mahmud kethudâ-yı muhzırân, Abdi Çelebi b. Hüseyin, Veli b. Mahmud, Şükrullah b. Mustafa.