İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 648 Hüküm no: 759 Orijinal metin no: [96b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Manol’un Koka’da üç bin akçe deyni olduğunu ispat edemediği Yemîn. Zimmî tâifesinden Nikola v. Manol nâm zimmî mahfil-i kazâda işbu bâ‘isü’s-sifr Koka v. ( ) nâm zimmî muvâcehesinde üzerine da‘vâ ve takrîr-i kelâm edip mezbûr Koka zimmetinde ba‘de küllî hesâb cihet-i deyn-i şer‘îden bin iki yüz akçe bir ve bin sekiz yüz akçe bir cem‘an üç bin akçe hakkım olup taleb eylediğimde vermede ta‘allül eder suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘î-i mezbûrun ba‘de küllî hesâb zimmetinde cihet-i deyn-i şer‘îden bin iki yüz bir ve bin sekiz yüz bir cem‘an müdde‘î-i mezbûra üç bin akçe deyni olmadığına yemîn teklîf olundukda mezbûr Koka dahi alâ-vefki’l-mesûl yemîn billâhillezî enzele’l-İncîle alâ-İsa aleyhisselâm etmeğin mûcebince müdde‘î-i mezbûr Nikola bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-âşir min-Zilka‘deti’ş-şerîfe li-sene isneteyn ve seb‘în ve elf. Şuhûdü’l-hâl: es-Sâbıkūn.